لوک سبھا میں بجٹ پر بحث کے جواب کے دوران وزیر مالیات نرملا سیتا رامن نے کانگریس کے سینئر رہنما راہل گاندھی پر جم کر نشانہ سادھتے ہوئے کہا کہ کانگریس 'ہم دو ہمارے دو' پر چل رہی ہے، انہوں نے کہا کہ راہل گاندھی نے جمہوری اقدار کو توڑا ہے۔
مرکزی وزیر آج لوک سبھا میں بجٹ پر بحث کا جواب دے رہی ہیں، آج بجٹ سیشن کے پہلے حصے کا آخری دن ہے۔ اس سے قبل کل راجیہ سبھا میں سیتا رامن نے بجٹ پر بحث کا جواب دیا تھا۔
وزیر خزانہ نرملا سیتارامن نے کہا کہ اس بجٹ سے ملکی معیشت کو فروغ ملے گا۔ انہوں نے کہا کہ وبا کے باوجود بھی ملک خود کفیل بنے گا۔ وزیر خزانہ نے کہا کہ بجٹ میں کی گئی اصلاحات کی وجہ سے بھارت کا دنیا کی اعلیٰ معیشت بننے کا راستہ صاف ہوجائے گا۔ وزیر خزانہ نے کہا کہ یہ بجٹ وہ راستہ ہے جس سے ملک خود کفالت کی راہ پر گامزن ہوگا۔
وزیر خزانہ نرملا سیتارامن نے بجٹ پر بحث کے جواب میں کہا کہ دنیا کے بہت سے ممالک میں جہاں کورونا ایک بار پھر اپنا غیظ و غضب ظاہر کررہا ہے، بھارت میں وزیر اعظم نریندر مودی کی سربراہی میں ہم کورونا کو شکست دینے میں کامیاب ہوئے ہیں۔ انہوں نے کہا کہ بھارت میں کورونا پر قابو پانے کی وجہ سے معیشت بہتری کی جانب گامزن ہوئی ہے اور ہم وزیر اعظم مودی کے خود انحصار بھارت کے ہدف کی طرف بڑھے ہیں۔
سیتا رامن نے کہا کہ ہم لوگ دو لوگ کی فکر کر رہے ہیں، جبکہ دو مزید لوگ ہیں جنکی فکر کی جانی چاہئے۔۔۔بیٹی اور داماد لیکن ہم ایسا نہیں کرتے ہیں، مرکزی وزیر نے کہا کہ پی ایم سوانیدھی اسکیم کے تحت 50 لاکھ اسٹریٹ وینڈر کو ایک سال کے لئے دس ہزار روپئے فراہم کئے گئے ہیں۔
انہوں نے کہا کہ جو لوگ ہم پر کرونی کا الزام عائد کرتے ہیں انہیں میں کہنا چاہتی ہوں کہ سوانیدھی یوجنا کی رقم کرونی کو فراہم نہیں کی جاتی ہے۔ انہوں نے کانگریس پر طنز کرتے ہوئے کہا کہ داماد کو ان ریاستوں میں زمین فراہم کی جاتی ہے جہاں پہلے کبھی کچھ پارٹیوں کی حکومت تھی، راجھستھان، ہریانہ میں بھی ایسا ہوتا تھا۔
کانگریس پر حملہ آور ہوتے ہوئے نرملا سیتا رامن نے کہا کہ سوانیدھی یوجنا سے غریبوں کا فائدہ ہوا ہے، دلتوں اور پسماندہ طبقات کا فائدہ ہوا ہے، ہم ان کے لئے کام کرتے ہیں، کسی داماد کے لئے کام نہیں کرتے ہیں۔ انہوں نے کہا کہ ہماری کرونی عوام ہے۔
