شمالی تریپورہ ضلع کے سب ڈویژن پانیساگر میں دو روز قبل وشوا ہندو پریشد کی ریلی کے دوران پیش آئے پرتشدد واقعات میں مساجد، دکانوں اور مکانات پر حملہ کرکے نقصان پہنچایا گیا۔ بنگلہ دیش میں درگا پوجا کے دوران ہوئے تشدد کے واقعات کے خلاف احتجاجی ریلی نکالی گئی تھی، جبکہ اس دوران مسلمانوں کو تشدد کا نشانہ بنایا گیا۔ اطلاعات کے مطابق اس دوران تقریباً 8 مساجد اور سینکڑوں دکانوں میں توڑ پھوڑ کی گئیں، لیکن ابھی تک حکومت کی جانب سے پرتشدد واقعات کے خلاف کوئی خاطر خواہ کاروائی نہیں کی گئی۔
اس ضمن میں کانگریس کے سابق صدر و سینیئر رہنما راہل گاندھی نے ٹوئٹ کرتے ہوئے مرکزی و ریاستی حکومت کو شدید تنقید کا نشانہ بنایا۔ راہل گاندھی نے اپنے ٹوئٹ پر لکھا کہ ’تریپورہ میں ہمارے مسلمان بھائیوں پر تشدد کیا جارہا ہے۔ مذہب کے نام پر نفرت و فساد پھیلانے والے ہندو نہیں ہے بلکہ وہ ڈھونگی ہیں‘۔ انہوں نے مزید لکھا کہ' حکومت کب تک اندھی، بہری ہونے کا ناٹک کرتی رہے گی۔'
