ضلع گیا کے گروا اور کونچ بلاک کی کل 34 پنچایتوں کے ووٹوں کی گنتی جاری ہے۔ صبح آٹھ بجے سے کاؤنٹنگ شروع ہوئی جس کے بعد اب دوپہر بارہ بجے تک نتائج آنے شروع ہوگئے ہیں۔ کامیاب امیدواروں کے حمایتی کے درمیان خوشی و جشن کا ماحول ہے۔
وہیں ضلع انتظامیہ کی طرف سے کوشش کی جارہی ہے کہ جشن کے دوران آپسی جھگڑے نا ہوں۔ ضلع مجسٹریٹ ابھشیک کمار سنگھ نے باضابطہ اس کے لیے متعلقہ حکام کو ہدایت دی ہے کہ وہ گاؤں اور علاقے میں نظر رکھیں، جہاں سے جھگڑے کی اطلاع ملے، فوراً کارروائی کریں۔ کاؤنٹنگ مراکز پر بھی کثیر تعداد میں پولیس کو تعینات کردیا گیا ہے۔
- مزید پڑھیں:۔ گیا: پنچایت انتخابات کے دوران فرضی ووٹنگ
وہیں کاؤنٹنگ مراکز پر انتظامات کے حوالے سے ڈی ایم ابھشیک کمار سنگھ نے کہا اس مرتبہ صرف امیدوار اور ایک کاؤنٹنگ ایجنٹ کو ہی ہال میں داخل ہونے کی اجازت دی گئی ہے۔ گزشتہ انتخابات کے مقابلے اس مرتبہ انتظامات مزید بہتر کیے گئے ہیں۔
واضح رہے کہ ضلع کے گروا بلاک کے رکھو ناتھ پور پنچایت سے محمد اظہر نے مکھیا کے عہدے پر جیت درج کی ہے۔ محمد اظہر کو 1287 ووٹ ملے جبکہ دوسری پوزیشن کے امیدوار کو 858 ووٹ ملے ہیں۔ رکھوناتھ پور پنچایت میں آٹھ ہزار 8 سو ووٹرز ہیں، جس میں پانچ ہزار ووٹنگ ہوئی تھی۔ یہاں اس پنچایت میں 15 سو مسلم ووٹرز ہیں۔
