گزشتہ روز راجیہ سبھا میں ہنگامہ آرائی کرنے پر 12 اراکین کو ایوان سے معطل کر دیا گیا تھا جس کے بعد اپوزیشن نے ان ارکان کی معطلی واپس لینے کا مطالبہ کیا۔
اس معاملے میں پارلیمانی امور کے وزیر پرلہاد جوشی نے کہا کہ 'ارکان پارلیمنٹ کی معطلی رد ہونے پر ان تمام کو ایوان میں معافی مانگنی ہوگی۔
انہوں نے کہا کہ 'کانگریس صدر سونیا گاندھی اور راجیہ سبھا میں قائد حزب اختلاف ملکارجن کھرگے کو یہ نہیں لگتا کہ ایوان میں جو کچھ ہوا اس پر کارروائی ہونی چاہئے۔ ملک کے عوام اب اس تکبر کو برداشت نہیں کریں گے۔
مرکزی وزیر نے کہا کہ 'کسانوں کی حالت خراب ہے تو اس کا ذمہ دار کون ہے؟ مدھیہ پردیش میں کانگریس نے اور نندی گرام میں سی پی ایم نے کسانوں پر گولی چلائی تھی۔
دریں اثنا مرکزی وزیر زراعت نریندر سنگھ تومر نے کہا کہ وزیر اعظم نریندر مودی کی حکومت کسانوں کے لیے پرعزم ہے اور رہے گی۔ آج تک کسی نے کسانوں کے لیے اتنا کچھ نہیں کیا جتنا مودی حکومت نے کیا ہے۔
