مرادآباد: ریاست اتر پردیش کے مرادآباد کے رکن پارلیمان ڈاکٹر ایس ٹی حسن نے بابا رام دیو کے متنازع بیان پر اپنا ردعمل ظاہر کرتے ہوئے کہا کہ بابا رام دیو کی مصنوعات کا بائیکاٹ کریں۔ بتا دیں کہ بابا رام دیو کے مسلمانوں اور اسلام پر دیے گئے متنازعہ بیان کے بعد ان کے خلاف احتجاج شروع ہوگیا ہے۔ مرادآباد کے ایس پی ایم پی ڈاکٹر ایس ٹی حسن نے بابا رام دیو کی مصنوعات کا بائیکاٹ کرنے کی بات کو دہرایا ہے۔
دراصل آج دیوبند کے دارالعلوم نے ملک بھر کے مسلمانوں سے بابا رام دیو کی مصنوعات کے بائکاٹ کرنے کی اپیل کی ہے۔ جس پر سماجوادی ایم پی ڈاکٹر ایس ٹی حسن نے بھی اپنا شدید ردعمل ظاہر کیا ہے۔ سماج وادی پارٹی کے رکن پارلیمنٹ ڈاکٹر ایس ٹی حسن کا کہنا ہے کہ بابا رام دیو اسلام کو نہیں جانتے ہیں اور انہوں نے جس طرح سے بیان دیا ہے، یہ مسلمانوں کی توہین ہے۔ انہوں نے اسلام کی توہین کی ہے۔ نماز میں عبادت کی جاتی ہے اور اسلام کے بنیادی رکن میں نماز ہے، زکوٰۃ بھی ہے اور حج بھی ہے۔
انہوں نے مزید کہا کہ اسلام انسانیت کا درس دیتا ہے۔ بابا رام دیو دوائیں بناتے ہیں۔ گائے، گوبر اور پیشاب بیچتے رہیں تو بہتر ہے پھر انہیں اسلام کی کیا خبر؟ اور جہاں تک دیوبند سے ان کی مصنوعات کے بائیکاٹ کا تعلق ہے تو مسلمان انہیں نہیں خریدتے، کیونکہ ان میں گائے کا پیشاب ملا ہوا ہوتا ہے۔ اگر دیوبند کا بائیکاٹ کرنے کا مطالبہ ہے تو بائیکاٹ ہونا چاہیے۔
