مولانا ولی رحمانی کی رحلت عالم اسلام کا عظیم خسارہ: مولانا محفوظ الرحمن فاروقی

آل انڈیا مسلم پرسنل لاءبورڈ کےجنرل سیکریٹری اور امیر شریعت بہار و اڑیسہ مولانا ولی رحمانی کے انتقال پر اُن کے خلیفہ مجاز و مسلم پرسنل لا بورڈ کے ممبر مولانا محفوظ الرحمٰن فاروقی نے گہرے غم و رنج کا اظہار کیا اور اسے ملت اسلامیہ اور عالم اسلام کے ایک عظیم خسارہ سے تعبیر کیا۔

مولانا محفوظ الرحمن فاروقی نے بتایا کہ مولانا ولی رحمانی اپنے وقت سے آگے کی سوچ رکھتے تھے۔ یہی وجہ ہے کہ عام علماء سے ہٹ کر مولانا محترم نے نوجوانوں کو پروفیشنل کورسز میں داخلے کے لیے تعلیمی اداروں کا جال بچھایا رحمانی تھرٹی کے نام سے آئی اے ایس اور آئی پی ایس جیسے مسابقتی کراچی امتحانات کے لیے راہ ہموار کی مولانا اپنے کارناموں اور علمی خدمات کی وجہ سے ہمیشہ یاد رکھے جائیں گے۔

مولانا محفوظ الرحمن فاروقی نے کہا کہ مولانا ولی رحمانی ، مولانا محمد علی مونگیریؒ بانی ندوۃ العلماء کے پوترے ہیں۔ عالم اسلام میں اللہ تعالی نے آپ کو اس قدر شہرت عطاء کی کہ آپ کی خدمات کو پوری اسلامی دنیا تسلیم کرتی ہے۔

مولانا ولی رحمانی کی سیاسی خدمات بھی قابل قدر ہیں وہ دو مرتبہ بہار اسمبلی کے ڈپٹی اسپیکر بھی رہ چکے ہیں اور انہوں نے 22 سال ایم ایل سی کی خدمات بھی انجام دی ہیں۔ اس کے بعد انہوں نے سیاسی زندگی کو خیر باد کہہ کر دعوت و تبلیغ کا کام شروع کیا اور خانقانہ رحمانیہ میں اپنے والد کے جانشین مقرر ہوئے۔

مولانا محفوظ الرحمن فاروقی نے کہا کہ مولانا ولی رحمانی نے اپنے تعلیمی ادارے رحمانی تھرٹی کے ذریعہ مسلم طلبہ کو سیول سرویسس اور دیگر مسابقتی شعبوں میں لانے کا جو کام انجام دیا ہے وہ بڑے بڑے تعلیمی ادارے بھی کرنے سے قاصر رہے۔

مولانا ولی رحمانی نے بہت سارے لوگوں کو اعلی مقام تک پہنچانے میں اہم کردار ادا کیا۔ کسی کو ایم ایل اے بنانے میں مدد کی تو کسی کو ایم ایل سی بننے میں رہنمائی کی اور خود مجھے ''مولانا محفوظ الرحمن فاروقی'' کو مسلم پرسنل لا بورڈ کا ممبر بنایا اور اپنا خلیفہ مجاز بھی بنایا۔

مولانا محفوظ الرحمن فاروقی نے تمام مسلمانوں سے مولانا ولی رحمانی کے لیے دعائے مغفرت کرنے کی اپیل کی۔