دہلی نائب وزیر اعلیٰ منیش سسودیا اور جیل میں بند دہلی کے وزیر ستیندر جین نے دہلی حکومت میں وزرا کے عہدوں سے استعفیٰ دے دیا ہے۔ اطلاعات کے مطابق وزیر اعلی اروند کیجریوال نے دونوں وزراء کے استعفے قبول کر لیے ہیں۔ دونوں وزراء ان دنوں تنازعات میں گھرے ہوئے ہیں۔ بی جے پی کی طرف سے ان وزراء کے استعفیٰ کا مسلسل مطالبہ کیا جا رہا تھا۔ اس دوران دہلی حکومت میں یہ بڑا ردوبدل ہوا ہے۔ عام آدمی پارٹی نے کہا کہ دہلی کے لاکھوں بچوں کے والدین اس فیصلے سے غمزدہ ہیں۔
دراصل سی بی آئی نے 26 فروری کو سسودیا کو دہلی ایکسائز پالیسی کیس میں مجرمانہ سازش، انسداد بدعنوانی ایکٹ کی دفعہ 7 اور شواہد کو تباہ کرنے اور اس کے ساتھ چھیڑ چھاڑ کے الزام میں حراست میں لیا تھا۔ اس سے پہلے سی بی آئی نے انہیں تین بار نوٹس دیا تھا اور پوچھ گچھ کے لیے اپنے دفتر بلایا تھا۔ اس کے علاوہ 17 اگست 2022 کو سسودیا کے گھر، دفتر اور گاؤں میں چھاپہ مار کر دستاویزات اور شواہد اکٹھے کیے گئے تھے۔
واضح رہے کہ سپریم کورٹ نے شراب گھوٹالے میں گرفتار نائب وزیر اعلیٰ منیش سسودیا کے معاملے میں مداخلت کرنے سے انکار کردیا۔ سپرویم کورٹ ان کو دہلی ہائی کورٹ سے رجوع ہونے کے لیے کہا ہے۔ بتایا جا رہا ہے کہ اس کے فوراً بعد عام آدمی پارٹی نے دہلی ہائی کورٹ کا رخ کیا۔ سماعت بدھ کو ہو سکتی ہے۔ یاد رہے کہ 'بجلی کا بل آدھا کرنے پانی کے بل معاف کرنے' کے وعدے کے ساتھ دہلی میں اقتدار میں آنے والی عام آدمی پارٹی نے جب ایجنڈے میں تعلیم کو سرفہرست رکھا۔ دوسرے نمبر پر صحت۔ کیجریوال حکومت نے پچھلی حکومتوں کے مقابلے تعلیم کے لیے تقریباً دوگنا بجٹ رکھا۔ اس حکومت نے ہر سال دہلی کے کل بجٹ کا 24 سے 25 فیصد تعلیم کے لیے مختص کیا تھا۔ اس کے استعمال کا خاکہ دہلی کے وزیر تعلیم ہوتے ہوئے منیش سسودیا نے تیار کیا تھا۔
