نندی گرام میں ویل چیئر پر ممتا کا مارچ

مغربی بنگال کی انتخابی جنگ میں مزید تیزی آ گئی ہے۔ ووٹنگ کے پہلے مرحلے کے بعد ممتا بنرجی کی نگاہیں اب دوسرے مرحلے پر ہیں۔ خاص بات یہ ہے کہ ممتا کی نگاہ اب نندی گرام پر ہے، جہاں سے وہ خود انتخابی میدان میں ہیں۔

مغربی بنگال کے انتخابات میں نندی گرام پر سب کی نظریں ٹکی ہوئی ہیں۔ یہاں سے مغربی بنگال کی وزیر اعلی ممتا بنرجی انتخابی میدان میں ہیں۔ ان کا مقابلہ بی جے پی کے امیدوار شوبھیندو ادھیکاری سے ہے۔ شبھیندو ادھیکاری نے یہاں سے ممتا بنرجی کو شکست دینے کا دعوی کیا تھا جبکہ ممتا بنرجی نے بھی پوری طاقت کے ساتھ انتخابی مہم شروع کردی ہے۔ ادھر ممتا بنرجی آج نندی گرام میں روڈ شو کررہی ہیں۔

یہ روڈ شو 8 کلومیٹر کے لیے تجویز کیا گیا ہے، جو کھوریدارم موڑ سے شروع ہوکر ٹھاکر چوک تک جانا ہے۔ تاہم ، روڈ شو کے دوران ہی ممتا نے اپنا راستہ تبدیل کردیا ہے۔ ممتا طے شدہ راستہ چھوڑ کر گائوں کی طرف مڑ گئی ہیں۔

ممتا بنرجی کے ٹھاکر چوک میں دو پہر 1.30 بجے ایک جلسہ عام ہے۔ اس جلسہ عام سے خطاب کے بعد وہ دو بجے بوئیل دوم میں جلسہ عام سے خطاب کریں گی۔