راجیہ سبھا میں اپوزیشن لیڈر غلام نبی آزاد کی مدت کار ختم ہونے کے بعد اب کانگریس کے سینئر لیڈر اور لوک سبھا میں کانگرس کے لیڈر رہ چکے ملک ارجن کھڑگے راجیہ سبھا میں اپوزیشن پارٹی کے لیڈر ہوں گے۔ چیئرمین نے انہیں 16 فروری سے اپوزیشن لیڈر تسلیم کیا ہے۔ اس سے قبل راجیہ سبھا میں حزب اختلاف کے رہنما غلام نبی آزاد کی مدت پوری ہونے کی وجہ سے یہ عہدہ خالی ہوگیا تھا۔
ذرائع کے مطابق راجیہ سبھا میں اپوزیشن کے ڈپٹی لیڈر آنند شرما بھی چاہتے تھےکہ انہیں اپوزیشن کا لیڈر بنایا جائے۔ مگر حال ہی میں پارٹی میں اندورنی اختلافات اور عبوری صدر سونیا گاندھی کو لکھے خط کے بعد پارٹی قیادت انہیں یہ ذمہ داری دینے میں ہچ کچارہی تھی۔
واضح رہے کہ کانگریس نے گذشتہ دنوں ملک ارجن کھڑگے کو راجیہ سبھا میں غلام نبی آزاد کی جگہ اپوزیشن رہنما بنانے کا فیصلہ کیا تھا اور اس سلسلہ میں ایوان بالا کے صدر نشین ایم وینکیا نائیڈو کو ایک مکتوب بھی روانہ کیا گیا تھا۔
وینکیا نائیڈو کو روانہ کیے گئے مکتوب میں بتایا گیا تھا کہ غلام نبی آزاد کی جگہ کھڑگے کو اپوزیشن کا رہنما مقرر کیا جائے، جبکہ غلام نبی آزاد کی راجیہ سبھا کے رکن کی حیثیت سے معیاد 15 فروری کو ختم ہو رہی ہے۔
جموں و کشمیر سے ایوان بالا میں نمائندگی کرنے والے غلام نبی آزاد کی میعاد میں اس لیے توسیع نہیں ہوسکتی کیونکہ اب ریاست میں اسمبلی باقی نہیں ہے۔ دفعہ 370 کی تنسیخ کے بعد مرکز نے جموں و کشمیر کو مرکز کے زیر انتظام علاقہ بنادیا ہے اور اسمبلی تحلیل ہے'۔
