ممبئی میں انوراگ کشیپ اور تاپسی پنو کے گھر پر انکم ٹیکس کی چھاپے ماری کے بعد ریاستی حکومت نے مرکزی حکومت پر تنقید کرتے ہوئے کہا کہ مرکزی حکومت کے خلاف اگر کوئی آواز اٹھاتا ہے تو اس کے خلاف اسی طرح کی ایجنسیوں کا استعمال کیا جاتا ہے۔
اقلیتی امور کے ریاستی وزیر نواب ملک نے کہا چونکہ انوراگ کشیپ اور تاپسی پنو نے حکومت کی پالیسیوں کے خلاف آواز اٹھانے کی غلطی کی ہے، اس لئے یہ کاروائیاں کی جارہی ہیں۔
ملک نے کہا کہ مرکزی حکومت کے خلاف یا اس کی پالیسیوں کے خلاف کسی نے بھی آواز اٹھائی تو اس کے خلاف اسی طرح کی کارروائی کی جائے گی۔ اسی کارروائی کی زد میں انوراگ کشیپ اور تاپسی پنو بھی آ چکے ہیں۔
ملک نے کہا کہ پچھلے کئی دنوں سے انوراگ اور تاپسی مودی حکومت کی پالیسیوں کے خلاف آواز اٹھاتے رہے ہیں۔ وہ اس بارے میں ٹویٹ بھی کرتے رہے ہیں۔ جس کی وجہ سے انھیں نشانہ بنایا گیا۔ اسلئے اب ملک میں ہر ایک کو یہ بات بخوبی معلوم ہوجانی چاہیے کہ مرکزی حکومت یعنی مودی حکومت کی کسی بھی پالیسی کے خلاف آواز اٹھانے کا مطلب ہے کہ ان کے خلاف ای ڈی یا انکم ٹیکس جیسی ایجنسیاں کارروائی کریں گی۔
