جے پور: مستقل ملازمت کے مطالبہ پر حکومت کے خلاف مظاہرہ کر رہے پیرا ٹیچرز نے احتجاج میں مزید شدت پیدا کرنے کے لیے مہا پڑاؤ کا اعلان کیا۔ اس اعلان کے بعد کثیر تعداد میں مدرسہ پیرا ٹیچرز، راجیو گاندھی پیرا ٹیچرز اور شکشا کرمی جے پور کے شہید اسمارک پہنچے۔ یہاں پر ان تمام لوگوں کی جانب سے راجستھان حکومت کے خلاف احتجاجی مظاہرہ کیا گیا اور حکومت کے خلاف زور دار نعرے بازی کی گئی۔
یہاں سے یہ مطالبہ کیا جا رہا ہے کہ کانگری نے اپنے انتخابی منشور میں ہم لوگوں کو مستقل کرنے کا جو وعدہ کیا تھا حکومت کو چاہیے کہ اس وعدے کو پورا کرے اور ہماری ملازمت مستقل کرے۔ ہم لوگوں سے کیا گیا وعدہ جب تک راجستھان حکومت مکمل نہیں کرتی ہے تب تک ہم لوگ یہاں سے واپس اپنے گھروں کو نہیں جائیں گے۔
یہ بھی پڑھیں:
جے پور: مدرسہ پیرا ٹیچرز کا بڑے پیمانے پر احتجاجی دھرنا
مظاہرین نے ای ٹی وی بھارت اردو سے بات کرتے ہوئے کہا کہ ہم لوگ 15 اکتوبر سے شہید اسمارک پر غیر معینہ دھرنا دے رہے تھے، جب ہماری آواز کی کوئی سنوائی نہیں ہوئی تو ہم لوگوں نے بھوک ہڑتال بھی کیا۔ اس کے بعد بھی جب کوئی سنوائی نہیں ہوئی تو ہم لوگوں کی جانب سے مہا پڑاؤ کا اعلان کیا گیا۔
مظاہرین کی تعداد کو دیکھتے ہوئے کثیر تعداد میں پولیس کے جوان، آر اے سی کے جوان، ایس ٹی ایف سمیت دیگر پولیس فورسز کو بھی تعینات کیا گیا ہے۔
