اننت ناگ: وادی کشمیر میں سرکاری اراضی بشمول کاہچرائی اور روشنی لینڈ سے عوام کی بے دخلی کے تحت انہدامی کارروئی کا سلسلہ جاری ہے۔ وہیں آج صبح ضلع اننت ناگ کے مہندی کدل علاقے میں سینئر حریت رہنما قاضی احمد یاسر کے شاپنگ کمپلیکس کو مہندم کیا گیا۔ ڈپٹی کمشنر اننت ناگ بشارت قیوم کی ہدایت پر میونسپل کونسل اننت ناگ اور محکمہ مال کے افسران کی ایک مشترکہ ٹیم نے مہندی کدل اننت ناگ میں واقع سینئر حریت رہنما و سابق میر وعظ قاضی احمد یاسر کے شاپنگ کمپلیکس کو منہدم کردیا تاہم دکانوں کو سیل کر دیا گیا ہے۔ واضح رہے کہ قاضی احمد یاسر اور ان کا بھائی قاضی شبلی پچھلے کئی سالوں سے جیل میں قید ہیں۔
واضح رہے کہ وادی میں سرکاری اراضی بشمول کاہچرائی اور روشنی لینڈ سے عوام کی بے دخلی کے تحت انہدامی کارروئی کا سلسلہ جاری ہے۔ وہیں ضلع اننت ناگ میں بھی انہدامی کارروائی جاری رہی۔ ڈپٹی کمشنر اننت ناگ جناب بشارت قیوم کی ہدایت پر میونسپل کونسل اننت ناگ اور محکمہ مال کے افسران کی ایک مشترکہ ٹیم نے نئی بستی اننت ناگ میں غیر قانونی تجاوزات کے خلاف مہم شروع کی۔ نئی بستی اور کھنہ بل علاقوں میں روشنی لینڈ ایکٹ کے تحت 16 کنال اور 4 مرلہ اراضی سے تجاوزات کو ہٹایا گیا۔
مزید پڑھیں:۔ Demolition Operation in JK الطاف کلو کے خلاف کارروائی کا آغاز
نائب تحصیلدار اننت ناگ شیراز احمد نے ذرائع ابلاغ کے نمائندوں سے بات کرتے ہوئے بتایا کہ قصبہ اننت ناگ میں تقریباً 80 فیصد زمین پر ناجائز قبضہ کو ہٹایا گیا ہے۔ انہوں نے اننت ناگ کے عوام سے اپیل کرتے ہوئے کہا کہ اگر کسی کے پاس ابھی بھی سرکاری زمین موجود ہے تو وہ از خود اس کو سرکار کے حوالے کر دے۔ انہوں نے مزید لوگوں سے تعاون کی اپیل کی اور کہا کہ حکومت کی اس مہم کو کامیاب بنانے کے لئے ضلع انتظامیہ اپنا تعاون پیش کرے اور آنے والے دنوں میں اس مہم میں تیزی لائی جائے گی تاکہ غیر قانونی طور پر قبضہ جات کو ہٹانے میں سو فیصد کامیابی ملے۔
