نئی دہلی: نائب وزیر اعلیٰ اور پی ڈبلیو ڈی کے وزیر منیش سسودیا نے دہلی میں ٹریفک کی آسانی کی غرض سے 7 اہم فلائی اووروں کی مضبوطی اور مرمت کے کاموں کو منظوری دی ہے، جن میں افریقہ ایونیو فلائی اوور، موتی باغ فلائی اوور، ساوتری سینما فلائی اوور، آئی ٹی او فلائی اوور ، ڈسٹرکٹ سینٹر فلائی اوور، تلک نگر میٹرو فلائی اوور اور پنجابی باغ فلائی اوور شامل ہیں۔ ان فلائی اوورز کی مرمت کے کاموں کے لیے محکمہ تعمیر عامہ ( پی ڈبلیو ڈی ) کے وزیر منیش سسودیا نے 12.46 کروڑ روپے کے پروجیکٹوں کو منظوری دی ہے۔
ان پروجکٹوں کی تفصیلات بتاتے ہوئے منیش سسودیا نے کہا کہ وزیر اعلیٰ اروند کیجریوال کی قیادت میں دہلی حکومت لوگوں کی آسانی سے نقل و حرکت کے لیے بہتر سڑکیں اور فلائی اوور فراہم کرنے کے لیے پرعزم ہے۔ اس سمت میں دہلی کے 7 اہم فلائی اووروں کی مضبوطی اور مرمت کا کام پی ڈبلیو ڈی کے ذریعے کیا جائے گا۔ اس سے فلائی اوورز کی مضبوطی میں اضافہ ہوگا۔ اس کے ساتھ ساتھ ان فلائی اوورز کے کام کرنے کی کی میعاد 20 سال تک بڑھ جائے گی۔
پی ڈبلیو ڈی کے وزیر نے کہا کہ دہلی میں ہم پی ڈبلیو ڈی کے تحت فلائی اوورز کو منظم طریقے سے بہتر بنانے کے لیے کام کر رہے ہیں۔ انہوں نے کہا کہ یہ فلائی اوورز پرانے ہیں اور ان پر گاڑیوں کے لوڈ ہونے سے کنکریٹ کی سطح خراب ہو جاتی ہے اور اس سے گاڑیوں کی آمدورفت میں رکاوٹ آتی ہے۔ اس کے پیش نظر کیجریوال حکومت کی طرف سے اس کی مضبوطی کا کام شروع کیا جا رہا ہے تاکہ عام لوگوں کو کسی قسم کی مشکلات کا سامنا نہ کرنا پڑے۔ ان فلائی اوورز کے مضبوب ہونے کے بعد ان کو روزانہ استعمال کرنے والے لاکھوں افراد اس سے مستفید ہوں گے۔ انہوں نے پی ڈبلیو ڈی کے حکام کو ہدایت کی کہ فلائی اوورز کی مضبوطی کا کام بروقت مکمل کیا جائے۔
خیال رہے کہ کہ مضبوطی اور مرمت کے کام میں فلائی اوور کے کنکریٹ کی مرمت، ایکسپینشن جوائنٹس، بیرنگ وغیرہ کی مرمت کی جائے گی، جس کی وجہ سے فلائی اوور کی زندگی 20 سال تک بڑھ جائے گی۔ قابل ذکر ہے کہ دہلی کے فلائی اوورز کی دیکھ بھال محکمہ تعمیرات عامہ کے ذریعہ کی جاتی ہے۔ تاہم، بھاری ٹریفک کے دباؤ کی وجہ سے، فلائی اوورز کو معمولی خرابیوں کا سامنا کرنا پڑتا ہے۔ جس کی دیکھ بھال پی ڈبلیو ڈی کی مرمتی یونٹ وقتاً فوقتاً کرتی ہے۔ان فلائی اوورز کی تزئین و آرائش بھی کی جائے گی۔
یو این آئی
