چندی گڑھ: خراب موسم کے باعث ایک بار پھر انڈیگو کی پرواز پڑوسی ملک پاکستان میں داخل ہوگئی۔ دو ہفتوں میں یہ دوسرا موقع ہے کہ انڈیگو کی پرواز پاکستان کی فضائی حدود میں داخل ہوئی ہے۔ پرواز سری نگر سے جموں کے لیے روانہ ہوئی تھی۔ ٹیک آف کے بعد خراب موسم کے باعث یہ تقریباً پانچ منٹ تک پاکستان کی فضائی حدود میں ہی رہی۔ ایسا صرف ایک مرتبہ نہیں ہوا بلکہ دو مرتبہ یہ پرواز پاکستان کی فضائی حدود سے گزری۔ بالآخر پرواز کو امرتسر میں ہنگامی لینڈنگ کرنی پڑی۔
جانکاری کے مطابق یہ واقعہ اتوار کی دوپہر کو پیش آیا۔ انڈیگو کی پرواز نمبر 6E-2124 نے سری نگر سے تقریباً 3.36 بجے اڑان بھری۔ ٹیک آف کے 28 منٹ بعد خراب موسم کی وجہ سے پرواز جموں و کشمیر کے کوٹ جمیل کے راستے پاکستان میں داخل ہوئی۔ پرواز تقریباً 5 منٹ تک پاکستانی فضائی حدود میں رہی اور سیالکوٹ کے راستے جموں کے لیے روانہ ہوئی لیکن جموں میں خراب موسم کے باعث پرواز وہاں بھی لینڈ نہ کر سکی جس کے بعد پرواز امرتسر کے لیے روانہ ہوئی۔ اس کے بعد تقریباً 4.15 بجے فلائٹ نے دوبارہ ٹیک آف کیا اور پھر پرواز پاکستان کی سرحد میں داخل ہوگئی۔
اس مرتبہ یہ پرواز جموں و کشمیر کے کڈیال کلاں سے پاکستانی سرحد میں داخل ہوئی اور شام 4.25 بجے امرتسر کے اجنالہ میں ککڑ گاؤں کے قریب بھارتی سرحد پر واپس آئی۔ دونوں ممالک کے متعلقہ حکام نے یہ معلومات دی۔ ایئر لائن نے کہا کہ سری نگر-جموں انڈیگو کی پرواز خراب موسم کی وجہ سے اتوار کو پاکستان کی فضائی حدود میں داخل ہوئی تھی۔ مزید برآں، ایئر لائن کے ایک اہلکار نے خبر رساں ایجنسی کو بتایا کہ خراب موسم کی وجہ سے انڈیگو کی پرواز 6E-2124 کچھ دیر کے لیے پاکستان کی فضائی حدود میں داخل ہوئی اور پرواز نے امرتسر کی طرف ہنگامی لینڈنگ کی۔
یہ بھی پڑھیں:
- دوحہ جانے والے بھارتی طیارے کی پاکستان میں ہنگامی لینڈنگ
- بھارتی اسپائس جیٹ طیارے کی کراچی میں ہنگامی لینڈنگ
اہلکار نے بتایا کہ انڈیگو کی پرواز کے پاکستان کی فضائی حدود میں داخل ہونے سے قبل دونوں ممالک کے متعلقہ حکام کو اس واقعے سے آگاہ کر دیا گیا تھا۔واضح رہے کہ اس سے قبل انڈیگو کی فلائٹ نے 10 جون کو بھارتی وقت کے مطابق رات 8 بجکر 10 منٹ پر امرتسر ایئرپورٹ سے احمد آباد کے لیے اڑان بھری لیکن چند منٹوں میں ہی خراب موسم کے باعث پرواز کو پاکستانی فضائی حدود کی طرف موڑ دیا گیا۔ تاہم طیارہ تقریباً 31 منٹ تک پاکستانی فضائی حدود میں رہا۔
