حکومت نے دفاعی شعبہ میں خود کفیل کی سمت میں ٹھوس قدم اٹھانے کے ساتھ ساتھ موجودہ چیلنجوں سے نپٹنے کے لیے مسلح افواج کے ہاتھ مضبوط کرنے کے مقصد سے دفاعی بجٹ میں 9 فیصد کا اضافہ کرتے ہوئے سوا پانچ لاکھ کروڑ روپے سے زیادہ کا بجٹ مختص کیا ہے۔ Private Push for Defence in Budget 2022
وزیر خزانہ نرملا سیتا رمن نے منگل کے روز مالی برس 2022-23 کے لیے لوک سبھا میں عام بجٹ پیش کرتے ہوئے کہا کہ دفاعی بجٹ کے لیے 5,25,166 کروڑ روپے مختص کیے گئے ہیں۔ اس میں پنشن کی مد میں دی جانے والی رقم بھی شامل ہے۔ یہ سال 2021-22 کے چار لاکھ 78 ہزار 196 کروڑ کے دفاعی بجٹ کے مقابلہ میں 9 فیصد زیادہ ہے۔
انہوں نے کہا کہ بجٹ میں سرمایے کی تقسیم کو 152,369 کروڑ روپے کیا گیا ہے، جو مالی برس 2021-22 کے 135,000 کروڑ کے مقابلہ میں 12.6 فیصد زیادہ ہے۔ دفاعی بجٹ میں ریونیو کا حصہ 2.39 لاکھ کروڑ اور پنشن کے لئے 1.19 لاکھ کروڑ روپے رکھے گیے ہیں۔
حکومت نے دفاعی شعبہ میں میک ان انڈیا کی بنیاد پر خود کفیل بھارت کی سمت میں ایک بڑا قدم اٹھاتے ہوئے خرید کے بجٹ کا 68 فیصد حصہ گھریلو کمپنیوں کے لیے مقرر کردیا ہے۔
وزیر خزانہ نے کہا کہ دفاعی شعبہ میں مقررہ خریداری بجٹ کا 68 فیصد حصہ گھریلو کمپنیوں سے خریداری میں صرف کرنے کا التزام کیا گیا ہے۔ اس سے دفاعی شعبہ میں درآمد کم ہوگی اور گھریلو سطح پر ہی مسلح افواج کی ضروریات پوری کی جاسکیں گی۔
وزیر خزانہ نرملا سیتا رمن نے اس کے علاوہ نجی شعبہ کی شراکت بڑھانے کے لئے ایک اہم قدم اٹھایا ہے۔ اب دفاعی تحقیق و ترقی کو بھی نجی شعبہ کے لیے کھول دیا گیا ہے۔ بجٹ میں یہ التزام کیا گیا ہے کہ دفاعی تحقیق و ترقی کے لیے مقررہ مختص کی 25 فیصد رقم نجی شعبہ کے ساتھ تعاون میں خرچ کی جائے گی۔
انہوں نے کہاکہ نئی ٹیکنالوجی کے ٹیسٹ اور اس کی توثیق کے لیے نجی کمپنیوں کے لئے ایک آزاد ادارہ قائم کیا جائے گا۔
غیرمنافع بخش سوسائٹی آف انڈین ڈیفنس مینوفیکچررز (ایس آئی ڈی ایم) نے خریداری بجٹ کی 68 فیصد رقم گھریلو کمپنیوں کے لئے مقر ر کیے جانے کا خیرمقدم کیا ہے۔
ادارہ کے صدر ایس پی شکلا نے کہاکہ اس سے سرمایہ کاری کا بہاؤ بنا رہے گا اور صلاحیت سازی میں اضافہ ہوگا۔ اس سے پہلے گھریلو کمپنیوں سے خریداری کے لئے 58 فیصد حصہ مقرر تھا۔
انہوں نے کہا کہ دفاعی نظام اور پلیٹ فارم کے لیے ٹیسٹنگ اور توثیقی ادارہ کے قیام سے گھریلو صنعت کو فائدہ ہوگا۔
مزید پڑھیں:
- Union Budget 2022: وزرارتِ اقلیتی امور کے لیے پانچ ہزار بیس کروڑ روپے مختص
- Union Budget 2022 : عام بجٹ 2022 کے اہم نکات پر ایک نظر
- Union Budget MSME Sector: بجٹ ایم ایس ایم ای سیکٹر: جانئے چھوٹے پیمانے کی صنعت کو کیا ملا
- FM Allocates Rs 60,000 Cr to Drinking Water Project: ہر گھر نل سے جل یوجنا کے لیے 60 ہزار کروڑ روپے کا الاٹمنٹ
- RBI to Issue Digital Rupee: آر بی آئی ڈیجیٹل کرنسی لانچ کرے گی، وزیر خزانہ نے کیا اعلان
یو این آئی
