نئی دہلی: لوک سبھا کے اسپیکر اوم برلا نے کہا کہ ہندوستان اور اسرائیل کی مشترکہ حکمت عملی دہشت گردی کے خلاف جنگ میں دنیا کو ایک نئی سمت دے گی۔ دہشت گردی کی بڑھتی ہوئی لعنت کے بارے میں بات کرتے ہوئے برلا نے کہا کہ دہشت گردی ہندوستان اور اسرائیل دونوں کے لیے تشویش کا باعث ہے۔ انہوں نے اس بات پر زور دیا کہ ہندوستان اور اسرائیل جیسے جمہوری ممالک کو دہشت گردی کے خلاف جنگ میں تعاون بڑھانا چاہیے۔ انہوں نے یہ بھی کہا کہ بھارت اور اسرائیل کی مشترکہ حکمت عملی دہشت گردی کے خلاف جنگ میں دنیا کو ایک نئی سمت دے گی۔
نائب صدر اور راجیہ سبھا کے چیئرمین جگدیپ دھنکھڑ اور لوک سبھا کے اسپیکر اوم برلا کی مشترکہ دعوت پر اسرائیل کے نیسٹ (پارلیمنٹ) کے اسپیکر امیر اوہانا کی قیادت میں ایک اسرائیلی پارلیمانی وفد جمعہ 31 مارچ سے 4 اپریل تک ہندوستان کا دورہ کر رہا ہے۔ اسرائیل کے نیسٹ (پارلیمنٹ) کے اسپیکر امیر اوہانا کا عہدہ سنبھالنے کے بعد بطور اسپیکر یہ پہلا غیر ملکی دورہ ہے۔ آج وفد کے ارکان نے پارلیمنٹ ہاؤس میں اسپیکر لوک سبھا سے ملاقات کی۔
ہندوستان میں وفد کا خیرمقدم کرتے ہوئے برلا نے کہا کہ اسرائیل اور ہندوستان کے درمیان روایتی طور پر قریبی اور دوستانہ تعلقات رہے ہیں۔ انہوں نے یہ بھی کہا کہ ہندوستان اور اسرائیل دونوں ایک مضبوط جمہوری ورثہ رکھتے ہیں اور ساتھی جمہوریتوں کے طور پر دونوں ممالک میں بہت سی مشترکات ہیں جن میں متنوع ثقافتوں کا احترام کرنا، جمہوری اقدار کی پیروی کرنا اور عوام کی امیدوں اور امنگوں کے مطابق کام کرنا ہے۔ انہوں نے کہا کہ بدلتے ہوئے عالمی منظر نامے میں ہندوستان اور اسرائیل کے تعلقات زیادہ اہم ہو گئے ہیں۔
ہندوستان میں آباد یہودی برادری کا ذکر کرتے ہوئے برلا نے کہا کہ ہندوستان نے ہمیشہ یہودیوں کی حمایت کی ہے اور انہیں محفوظ ماحول فراہم کیا ہے۔ انہوں نے یہ بھی کہا کہ یہودیوں نے ہندوستان کی ترقی میں اہم کردار ادا کیا ہے۔ دونوں پارلیمانوں کے درمیان مضبوط پارلیمانی تعلقات کو نوٹ کرتے ہوئے برلا نے نیسٹ میں ہندوستان کے لیے پارلیمانی دوستی گروپ کی تشکیل پر خوشی کا اظہار کیا۔ انہوں نے اس بات پر زور دیا کہ دونوں پارلیمانوں کو بین الاقوامی فورمز پر مل کر کام کرنا چاہیے اور اس کے مطابق اجتماعی بات چیت اور مکالمے پر مبنی ایکشن پلان تیار کرنا چاہیے۔
یو این آئی
