نئی دہلی: روڈ ٹرانسپورٹ اینڈ ہائی ویز کے وزیر نتن گڈکری نے پیر کے روز منی پور میں قومی شاہراہ کے 16 منصوبوں کا افتتاح اور سنگ بنیاد رکھا۔
اس موقع پر گڈکری نے کہا کہ 298 کلومیٹر طویل منصوبوں پر 4،148 کروڑ روپے کی سرمایہ کاری کی گئی ہے۔ انہوں نے بتایا کہ یہ قومی شاہراہ منصوبے منی پور کو ملک کے باقی حصوں اور ہمسایہ ممالک کے ساتھ 'ہر موسم میں رابطہ' فراہم کریں گے اور خطے کی زرعی ، صنعتی اور سماجی و اقتصادی ترقی کو فروغ دیں گے۔
گڈکری نے کہا کہ اس منصونے سے ریاست کے دور دراز علاقوں میں صحت کی دیکھ بھال اور ہنگامی خدمات دستیاب ہوں گی۔ اس سے ریاست کے لوگوں کے لئے روزگار اور خود کے روزگار کے مواقع پیدا ہوں گے۔
مزید پڑھیں: سیاست میں واپسی پر رجنی کانت کا بیان
گڈکری نے بتایا کہ ریاست کے لئے 5000 کروڑ روپے کے منصوبوں کو بھی منظوری دے دی گئی ہے اور تفصیلی پروجیکٹ رپورٹ - ڈی پی آر کو چھ ماہ کے اندر مکمل کرلیا جائے گا اور ایک سال کے اندر کام شروع ہوجائے گا۔ انہوں نے بتایا کہ حکومت شمال مشرقی خطے کو انتہائی اہمیت دے رہی ہے۔
گڈکری نے کہا کہ تمام فریقوں سے مسائل کے حل اور منصوبوں کو مقررہ مدت میں مکمل کرنے کے لئے تعاون طلب کیا گیا ہے اور تمام منصوبوں کی تفصیلات ویب سائٹ پر ڈالی جائیں گی۔
