ریاست اترپردیش کے ضلع بارہ بنکی میں آزادی کے 75 برس مکمل ہونے پر منائے جا رہے آزادی کا امرت مہوتسو کے تحت سنیچر کو نہرو یوا کیندر کی جانب سے فٹ انڈیا فریڈم رن 2.0 کا اہتمام کیا گیا۔
8.3 کلومیٹر کی اس دوڑ کا مقصد نوجوانوں سمیت تمام عمر کے افراد کو فٹنس کے متعلق بیدار کرنا ہے اور اس کا نعرہ 'فٹنس کا ڈوز آدھا گھنٹا روز' رکھا گیا۔
بارہ بنکی شہر میں واقع کے ڈی سنگھ بابو اسٹیڈیم سے صبح 7 بجے اے ڈی ایم سندیپ کمار گپتا نے ہری جھنڈی دکھا کر دوڑ کو روانہ کیا۔ اس سے قبل انہوں نے ریبن کاٹ کر اس دوڑ کا افتتاح کیا۔ اس کے بعد دوڑ میں شرکت کر رہے نوجوان لڑکے اور لڑکیوں کو بہتر اور تندرست سماج کی تعمیر کے ساتھ روزانہ کے معمول میں 30 منٹ کی جسمانی ورزش کرنے کی حلف دلائی۔
مزید پڑھیں:۔ ڈوڈہ میں فِٹ انڈیا فریڈم رن کا اہتمام
اس موقع پر اے ڈی ایم سندیپ کمار گپتا نے کہا کہ اس قسم کے پروگرامز کے متعدد فائدے ہیں۔ پہلا تو یہ کہ نئی نسل کے لوگوں کو آزادی کی تاریخ کا علم ہوگا۔
انہیں یہ پتا چلے گا کہ کس قدر قربانیاں دینے کے بعد انہیں یہ آزادی حاصل ہوئی ہے۔ اسی کے ساتھ اس سے صحت و تندرستی حاصل ہوگی، جس سے لوگ فٹنس کے متعلق بھی بیدار ہوں گے۔
