سرینگر: 26 ستمبر کو بھارتی فضائیہ کا ایئر شو

سرینگر میں ستمبر کی 26 تاریخ کو بھارتی فضائیہ کی جانب سے ایک ائیر شو کا انعقاد کیا جارہا ہے۔ اس ائیر شو کے دوران بھارتی فضائیہ کے جنگی جہاز جھیل ڈل کے اُوپر اڑان بھریں گے۔

یہ پہلا موقع نہیں ہے جب بھارتی فضائیہ کے جنگی جہاز ایئر شو کریں گے، بلکہ اس سے قبل بھی 10 جولائی 2003 میں جنگی جہاز جھیل ڈل پر ہوئے ایئر شو میں حصہ لے چکے ہیں۔ اس حوالے سے بھارتی فضائیہ کے ایک اعلیٰ افسر نے ای ٹی وی بھارت کو بتایا کہ 'جموں و کشمیر انتظامیہ نے ایئر شو کا انعقاد 'آزادی کے امرت مہوتسو' کے تحت کیا ہے۔ اس سے نوجوانوں کو محکمۂ شہری ہوابازی کی جانب راغب کرانے کے ساتھ ساتھ وادی کی سیاحت کو فروغ دینا چاہتے ہیں۔'

26 ستمبر کو بھارتی فضائیہ کا ایئرشو

اُن کا مزید کہنا تھا کہ 'وادی کے نوجوانوں کو خاص طور پر فضائیہ میں زیادہ دلچسپی نہیں ہے۔ ہم سب کو اُمید ہے کہ شاید جنگی جہازوں کو کرتب کرتا دیکھ وہ اس جانب راغب ہوں اور اپنے لیے روزگار کے مواقع بھی حاصل کرسکیں۔' ایئر شو میں کون کون سے جہاز حصہ لیں گے؟ اس سوال کے جواب میں اُن کا کہنا تھا کہ 'سوریا کرن ایروبیٹکس ٹیم اور ایس یو 30 کرتب دکھائٰیں گے، ہینڈ گلائیڈر کا مظاہرہ ہوگا اور اس کے علاوہ میگ 21 بائیسن جہاز کا فلائی ٹیسٹ ہوگا۔ اس کی فوٹو نمائش بھی ہوگی اور آکاش گنگا کی ٹیم اس کی ڈونگ بھی کرے گی۔' اس حوالے سے کشمیر کے صوبائی کمشنر پی کے پولے کا کہنا تھا کہ 'ایئر شو ستمبر کی 26 تاریخ کو منعقد کیا جارہا ہے تاہم 25 تاریخ کو ریہرسل کی جائے گی۔ اس موقع پر جموں و کشمیر کے لیفٹنینٹ گورنر منوج سنہا، اعلیٰ دفاعی افسران کے علاوہ ویسٹرن ایئر کمانڈ کے ایئر آفیسر کمانڈنگ ان چیف ہمارے مہمان ہوں گے۔ میں خود تمام انتظامات کا خیال رکھ رہا ہوں اور حال ہی میں، میں نے تمام متعلقین سے تفصیلی گفتگو بھی کی ہے'۔

اُن کا مزید کہنا تھا کہ 'جیسے بنگلور ایئر شو کا مقصد ایوی ایشن ٹیکنالوجی کی نمائش ہے، ویسے ہی ہمارے ایئر شو کا مقصد اس شعبے میں کیریئر کے مواقع کو اجاگر کرنے پر زور دینا ہے۔ اس لیے 3000 اسکولی طلبہ اور 700 استاتذہ کو ائیرشو دیکھنے کے لیے مدعو کیا گیا ہے۔ اس کے علاوہ محکمہ ٹرائیبل افئیرز سے بھی 30 سے 40 نوجوانوں کو نمائش کے دوران شارٹ لسٹ کیا جائے گا اور پھر اُن کو مفت پائلٹ تربیت دی جائے گی'۔ پولے کا کہنا ہے کہ' ایوی ایشن کو بطور کیریئر انتخاب کرنے والے طلبہ کو مشورہ دینے کے لیے کاؤنسلنگ مراکز بھی قائم کیے جائیں گے'۔