ریاست اتراکھنڈ کے چمولی ضلع میں ہند چین کے سرحدی علاقے سے ملحق سُمنا میں بارڈر روڈس آرگنائزیشن (بی آر او) کیمپ کے قریب سُمنا ہائی وے پر واقع سُمنا میں بی آر او کیمپ کے قریب گلیشیئر ٹوٹ کر ملاری سُمنا سڑک پر آگیا۔ بارڈر روڈس آرگنائزیشن کے کمانڈر کرنل منیش کپل نے اس واقعہ کی تصدیق کی ہے۔ کرنل کپل نے ٹیموں کو صورتحال کا جائزہ لینے کے لئے بھیج دیا ہے۔
خبروں کے مطابق بی آر او مزدور اس جگہ کے قریب سڑک کی تعمیر کے کام میں مصروف تھے جہاں یہ واقعہ پیش آیا۔ بتایا جارہا ہے کہ حد سے زیادہ برف باری کے باعث سرحدی علاقے میں بھی وائرلیس سیٹ کام نہیں کررہے ہیں۔ ڈی جی پی اشوک کمار نے بتایا ہے کہ واقعے میں کسی قسم کا جانی نقصان نہیں ہوا ہے لیکن خراب موسم کی وجہ سے صحیح صورتحال کا پتہ نہیں چل سکا ہے۔ صورتحال کا جائزہ لینے کے لئے ٹیمیں روانہ کردی گئیں۔ آئی ٹی بی پی کے جوان حادثہ میں سلامت ہیں۔
اسی دوران مرکزی وزیر داخلہ امت شاہ نے بھی نیتی گھاٹی کے سُمنا میں گلیشیر ٹوٹنے سے متعلق معلومات کا فوری نوٹس لیا ہے۔ اس واقعے کو سنجیدگی سے لیتے ہوئے انہوں نے اتراکھنڈ کو مکمل مدد کی یقین دہانی کرائی ہے اور آئی ٹی بی پی کو چوکس رہنے کی ہدایت کی ہے۔
دوسری طرف چمولی کے پولیس سپرنٹنڈنٹ یشونت سنگھ چوہان نے ایسے کسی بھی واقعے کی تردید کی ہے۔ وہیں دوسری جانب گلیشیر ٹوٹنے کی اطلاع کے ساتھ رشی کیش پولیس نے تری وینی گھاٹ کے ساتھ گنگا کے کنارے والے تمام گھاٹوں کو بھی خالی کرا لیا ہے۔ اطلاع ملنے کے بعد پولیس کسی بھی قسم کی لاپرواہی سے کام نہیں لے رہی ہے۔ واٹر پولیس اہلکار مسلسل گھاٹوں کی نگرانی کر رہے ہیں۔ رشی کیش پولیس نے الرٹ جاری کرتے ہوئے مقامی باشندوں کو گنگا گھاٹ یا آستھا روڈ کی طرف جانے سے منع کیا ہے۔
آپ کو یہ ضرور بتادیں کہ پچھلے تین دن سے وادیِ نیتی میں شدید برف باری ہورہی ہے۔ ملاری سے آگے جوشی مٹھ۔ ملاری شاہراہ بھی برف سے ڈھکی ہوئی ہے، جس سے فوج اور آئی ٹی بی پی کی گاڑیوں کی نقل و حرکت اور آنے جانے میں خلل پڑ رہا ہے۔
