محرم کے موقع پرشہر کے سبھی مرکزی چوراہوں پر ہورڈنگس نصب

ہمیں حضرت امام حسین کا پیغام لوگوں تک پہنچانا ہے چاہے یہ پیغام ہماری آواز کے ذریعے پہنچے یا ہورڈنگس کے ذریعہ پہنچے، یا پھر قلم کے ذریعے پہنچے، ہمیں ان کے پیغام کو لوگوں تک پہنچانا ہے ۔

ریاست اترپردیش کے ضلع مظفر نگر کے سبھی مرکزی چوراہوں پر محرم سے متعلق ہورڈنگ بورڈ لگائے گئے۔ واضح رہے کہ کورونا وبا کے پیش نظر کورونا گائیڈ لائن کے مطابق محرم کو گھروں میں ہی سادگی کے ساتھ منانے کی اجازت دی گئی۔

محرم کے موقع پر شہر میں جلوس نکالنے پر پابندی عائد کی گئی ہے۔ اس سے متعلق مزید معلومات دیتے ہوئے مظفرنگر کربلا کمیٹی کے ضلع صدر حسن مہدی نے بتایا کی کورونا وبا کی گائیڈ لائن کے مطابق اس سال بھی محرم سادگی کے ساتھ گھروں میں ہی منایا جائے گا اس میں نہ تو کوئی جلوس نکلے گا اور نہ ہی کوئی بڑی مجلس کا اہتمام ہوگا ۔

انہوں نےکہاکہ ہماری جانب سے شہر کے سبھی مرکزی چوراہوں پر ہورڈنگس اور پوسٹر لگائے گئے ہیں جس کا مقصد محرم کے پیغام کو عام کرنا ہے۔ محرم کا پیغام یہ ہے کہ ظلم کے خلاف آواز اٹھاؤ چاہے ظالم کتنا ہی طاقتور کیوں نہ ہو۔

ہمیں حضرت امام حسین کا پیغام لوگوں تک پہنچانا ہے چاہے یہ پیغام ہماری آواز کے ذریعے پہنچے یا ہورڈنگ کے ذریعہ پہنچے، چاہے قلم کے ذریعے پہنچے۔ ہمیں ان کے پیغام کو لوگوں تک پہنچانا ہے۔ اسی مقصد سے ہم نے شہر کے سبھی مختلف چوراہوں پر ہورڈنگ لگائے ہیں۔