بہار :گیارہ سو سے زائد عازمین حج کے جانے کی امید

گزشتہ ایک دہائی میں یہ پہلا موقع ہے جب ریاست بہار سے حج بیت اللہ کے لیے عازمین حج کی تعداد دو ہزار سے کم ہوگی۔

عالمی وبا کورونا وائرس کے سبب رواں برس بہت کم افراد حج بیت اللہ کے سفر پر جائیں گے، بہار سے بھی حج بیت اللہ کے لیے جانے والے عازمین حج کی تعداد انتہائی کم ہے۔

ریاست بہار سے سفر حج 2021 کے لیے 1654 لوگوں نے بیت اللہ جانے کے لیے درخواست دی ہیں۔

گزشتہ برس کرونا وباء کی وجہ سے لوگ اس مقدس فریضہ سے محروم ہو گئے تھے، اسی کے پیشِ نظر اس سال بھی زیادہ تر لوگوں نے خوف کی وجہ سے سفر سے دوری بنائی ہے اور کم تعداد میں لوگوں نے فارم جمع کیے ہیں۔

اس بار ریاست بہار سے حج بیت اللہ کو جانے والوں کی تعداد 1654 ہے۔

وہیں ریاستی حج کمیٹی اس کی تیاریوں میں مصروف ہے۔

حج کمیٹی کی کوشش ہے کہ امبار کیشن پوائنٹ(The Embarkation point ) گیا کو بنایا جائے۔

اس تعلق سے ریاستی حج کمیٹی کے چیف ایکزکیوٹیو آفیسر راشد حسین نے ای ٹی وی سے خصوصی گفتگو میں کہا کہ ان کی کوشش ہے کہ گیا میں امبارکیشن پوائنٹ بنایا جائے۔

سی ای او راشد حسین نے کہا کہ کورونا وباء کے سبب لوگوں نے کم درخواستیں دی ہیں۔ جبکہ ریاستی سطح پر ترغیبی مہم بھی چلائی گئی تھی۔

انہوں نے کہا کہ اس بار رقم کی ادائیگی کے لیے اب تک کوئی حتمی فیصلہ نہیں کیا گیا ہے۔