سپریم کورٹ نے جان لیوا سطح پر پہنچ چکی فضائی آلودگی کم کرنے میں ناکام مرکز اور ریاستی حکومتوں کے ساتھ ساتھ نوکر شاہوں کو اپنی ذمہ داری سے راہ فرار اختیارکرنے پر بدھ کو ان کی سرزنش کی اور کہاکہ وہ چاہتے ہیں کہ انہیں یہ بھی حکم دیا جائے کہ قومی راجدھانی خطہ میں فضائی آلودگی کم کرنے کے لیے پانی کے چھڑکاو سے لے کر گاڑیوں کو کیسے چلایا جائے۔
سپریم کورٹ نے کہا کہ ٹی وی زیادہ آلودگی پھیلا رہا ہے۔ عدالت کے چھوٹے آبزرویشن کو کئی بار بڑا ایشو بناکر پیش کیا جاتاہے۔ چیف جسٹس این وی رمنا اور جج ڈی وائی چندر چوڑ اور جج سوریہ کانت کی بنچ نے آلودگی کم کرنے میں مرکز، دہلی، ہریانہ ، پنجاب اور اتر پردیش حکومتوں کی اجتماعی کوشش میں تال میل کے فقدان اور نوکر شاہوں کے ٹال مٹول روپے پر سخت برہمی کا اظہار کرتے ہوئے یہ تبصرے کیے۔ بنچ نے کہا کہ فائیو اور سیون اسٹار سہولتوں میں بیٹھ کر کسانوں کو فضائی آلودگی کے لیے ذمہ دار ٹھہرایا جاتا ہے لیکن حکومت اور انڈین سائنس و ٹکنالوجی انسٹی ٹیوٹ کان پور سمیت دیگر کے مطالعہ اور حقائق سے لگتاہے کہ مسئلہ پرالی جلانے سے زیادہ گاڑیوں اور کوئلے سے چلنے والے بجلی آلات کے سبب آلودگی کی سطح میں مسلسل اضافہ ہورہا ہے۔
سپریم کورٹ نے راجدھانی دہلی کی سڑکوں سے 10-15 سال پرانی گاڑیوں کو سڑکوں سے ہٹانے کا خاص طورپر ذکر کیا۔ عدالت نے سوال کیاکہ انہیں روکنے کے لیے کون حوصلہ افزائی کرے گا۔ سماعت کے دوران دہلی حکومت نے کہا کہ اگر ہمسایہ ریاستوں نے گاڑیوں پر پابندی نہیں لگائی تو گھر سے کام کرنے کا کوئی مطلب نہیں ہے۔
سماعت شروع ہوتے ہی سالیسٹر جنرل تشار مہتا نے پچھلی سماعت کا ذکر کرتے ہوئے کہا کہ ٹیلی ویزن پر بحث کے دوران انہیں غیر ذمہ دار بتایا گیا ہے۔ اس پر چیف جسٹس نے کہا کہ ٹی وی پر بحث سے زیادہ آلودگی پھیل رہی ہے۔ ہر کوئی اپنے ایجنڈے پر کام کررہا ہے۔
مزید پڑھیں:سپریم کورٹ کے فیصلے کا خیر مقدم
بنچ نے دہلی حکومت کی جانب سے پیش سینئر ویکل اے ایس سنگھوی اور مرکزی حکومت کی جانب سے پیش سالیسٹر جنرل مہتا کی دلیلوں کے دوران کئی سخت تبصرے کیے۔ سنگھوی نے کہا تھا کہ سردیوں میں آلودگی بڑھنے کا بڑا سبب پرالی جلانا ہے۔ جب کہ مہتا نے مرکز کے سبھی ملازموں کے گھر سے کام کرنے پر معذوری ظاہر کی تھی۔
یو این آئی
