ویکسین کی قیمتوں میں تخفیف کرنے کی ہدایت

حکومت نے سیرم اور بھارت بائیوٹیک سے کہا ہے کہ وہ کورونا ویکسین کی قیمتوں میں تخفیف کریں، اس سے قبل کابینہ کے سکریٹری راجیو گابہ کی زیر صدارت اجلاس میں ویکسین کی قیمتوں کے معاملے پر تبادلہ خیال کیا گیا تھا، اب دونوں کمپنیوں سے توقع کی جارہی ہے کہ وہ اپنی ویکسین کی قیمتوں میں ترمیم کرینگے۔

ذرائع کے مطابق ملک میں 18 سال سے زیادہ عمر کے تمام افراد کے لیے ویکسینیشن شروع ہونے سے قبل مرکزی حکومت نے پیر کو سیرم انسٹی ٹیوٹ اور بھارت بائیوٹیک سے اپنے کوڈ 19 ویکسین کی قیمتوں میں تخفیف کرنے کو کہا ہے۔

اس سے قبل کابینہ کے سکریٹری راجیو گابہ کی زیر صدارت اجلاس میں ویکسین کی قیمتوں کے معاملے پر تبادلہ خیال کیا گیا جس کے بعد اب دونوں کمپنیوں سے توقع کی جارہی ہے کہ وہ اپنی ویکسین کی قیمتوں میں ترمیم کرینگے۔

قابل ذکر ہے کہ حیدرآباد میں واقع بھارت بائیوٹیک نے اپنے کووڈ 19 ویکسین (کوویکسین) کی ایک خوراک کی قیمت ریاستی حکومتوں کے لیے 600 روپئے اور نجی اسپتالوں کے لیے 1200 روپے مقرر کی ہے۔جبکہ پونے میں قائم دنیا کی سب سے بڑی ویکسین ساز کمپنی سیرم انسٹی ٹیوٹ آف انڈیا (ایس آئی آئی) نے کووڈ 19 ویکسین (کوویشیلڈ) کی فی خوراک قیمت ریاستی حکومت کے لیے 400 روپے اور نجی اسپتالوں کے لیے 600 روپئے تجویز کی ہے۔

اہم بات یہ ہے کہ یہ دونوں ٹیکے مرکزی حکومت کو فی خوراک 150 روپے کے حساب سے دستیاب ہیں۔ جس کے بعد ویکسین کی مختلف قیمتوں پر متعدد ریاستوں نے اعتراض جتایا ہے، دہلی کے وزیراعلیٰ اروند کیجریوال نے کہا کہ یہ منافع خوری کا وقت نہیں ہے۔