نئی دہلی: حکومت نے آج کہا کہ دنیا کے کچھ ممالک میں کووڈ انفیکشن کے بڑھتے معاملات اوربڑی تعداد میں ہونے والی اموات کی وجہ پیدا صورتحال پر گہری نظر رکھی جا رہی ہے اور ملک تمام احتیاطی تدابیر اختیار کرتے ہوئے صورتحال کا مقابلہ کرنےکے لیے پوری طرح تیار ہے۔India Prepared to Deal With Corona
مرکزی صحت اور خاندانی بہبود کے وزیر منسکھ منسکھ مانڈویہ نے کووڈ وبا سے نمٹنے کے لیے حکومت کی طرف سے اٹھائے جانے والے اقدامات کے بارے میں پارلیمنٹ کے دونوں ایوانوں میں از خود بیان دیتے ہوئے کہا کہ ملک میں صحت کا بنیادی ڈھانچہ اچھا اور ضروری ادویات وآکسیجن اور دیگر سامان کا وافر ذخیرہ موجود ہے۔
اراکین کی وضاحتوں کا جواب دیتے ہوئے انہوں نے کہا کہ ملک اس صورتحال سے نمٹنے کے لیے پوری طرح تیار ہے اور وہ خود عالمی ادارہ صحت کے ساتھ رابطے میں ہیں۔ بین الاقوامی ہوائی اڈوں پربیرون ملک سے آنے والے مسافروں میں سے دو فیصد کی اسکریننگ کی جارہی ہے اور اگر ضرورت پڑی تو اسے لازمی بنایا جاسکتا ہے۔ انہوں نے کہا کہ ملک کے تمام بڑے اسپتالوں میں آکسیجن پلانٹس کام کر رہے ہیں اور ان کی نگرانی کی جا رہی ہے۔
انہوں نے کہا کہ گزشتہ ایک سال کے دوران ملک میں کووڈ انفیکشن کی شرح میں کمی آئی ہے، روزانہ اوسطاً 153 نئے کیسز سامنے آ رہے ہیں، جبکہ دنیا میں یہ تعداد 5 لاکھ 87 ہزار ہے۔ جاپان، جنوبی کوریا، امریکہ، فرانس، یونان اور اٹلی جیسے ممالک میں کووڈ کے کیسز اور اموات کے اعدادوشمار میں اضافہ ہوا ہے۔ چین میں بھی کووڈ کے کیس اور اس سے ہونے والی اموات کے حوالے سے خبریں شائع ہو رہی ہیں۔
انہوں نے کہا کہ صورتحال کے پیش نظر حکومت نے ریاستوں کو ایڈوائزری جاری کی ہے جس میں ان سے احتیاطی تدابیر اختیار کرنے اور کمیونٹی کی نگرانی بڑھانے کے ساتھ ساتھ لوگوں کو بیدار کرنے کے لیے کہا گیا ہے۔ ریاستوں سے کہا گیا ہے کہ وہ مثبت کیسوں کی جینوم سیکوینسنگ کریں تاکہ وقت پر نئی اقسام کا پتہ لگایا جا سکے۔ نئے سال کی تقریبات اور تہواروں کے پیش نظر ریاستوں سے کہا گیا ہے کہ وہ کووڈ پروٹوکول پر عمل کریں۔
منسکھ مانڈویہ نے کہا کہ ریاستوں سے یہ بھی کہا گیا ہے کہ وہ لوگوں کو کووڈ ویکسین کی احتیاطی خوراک پر زور دیں۔ انہوں نے کہا کہ وہ تمام اراکین پارلیمنٹ سے بھی اپیل کرتے ہیں کہ وہ اپنے اپنے علاقوں میں لوگوں کو اس بارے میں آگاہ کریں اور کووڈ پروٹوکول پر عمل کرنے میں تعاون کریں۔ انہوں نے کہا کہ ملک میں اب تک 220 کروڑ سے زائد افراد کو ویکسین دی جاچکی ہیں۔ ملک کی 90 فیصد آبادی کو دونوں ویکسین مل چکی ہیں اور 22 کروڑ سے زیادہ لوگوں کو احتیاطی خوراکیں دی گئی ہیں۔
منسکھ مانڈویہ نے کہا کہ کووڈ کے مسئلہ پر سیاست نہیں کی جانی چاہئے۔ انہوں نے کہا کہ راجستھان کے تین ممبران پارلیمنٹ کی طرف سے تشویش ظاہر کرنے کے بعد، انہوں نے کانگریس لیڈر راہل گاندھی سے مطالبہ کیا ہے کہ وہ اپنی بھارت جوڑو یاترا میں کووڈ پروٹوکول پر عمل کریں اور اسے سیاسی چشمے سے نہیں دیکھا جانا چاہئے۔(یواین آئی)
