ریاست پنجاب کے شہر امرتسر کے خاصہ میں بی ایس ایف میس میں فائرنگ سے خوف و ہراس کا ماحول ہے۔ اس واقعہ میں 5 جوان ہلاک اور 6 زخمی ہوئے ہیں۔
تمام زخمیوں کو گرو نانک دیو اسپتال میں داخل کرایا گیا ہے، جہاں ان کا علاج جاری ہے۔
واقعہ کی اطلاع ملتے ہی پولیس نے موقع پر پہنچ کر تفتیش شروع کردی۔ بی ایس ایف میس میں فائرنگ کرنے والے کانسٹیبل کی شناخت فی الحال نہیں ہوئی ہے اور نہ اس بات کی معلومات ملی کہ اس نے کیوں گولی چلائی۔
اس واقعہ کے بعد بی ایس ایف افسر نے کہا کہ یہ ایک افسوسناک واقعہ ہے۔ اس واقعے میں 6 جوان زخمی ہوئے ہیں جب کہ 5 کی موت ہو گئی ہے۔ زخمیوں میں سے ایک کی حالت تشویشناک ہے۔
تفصیلات کے مطابق سیکٹر خاصہ اٹاری روڈ پر ڈیوٹی پر موجود بی ایس ایف کے ایک کانسٹیبل نے اپنے ساتھی اہلکاروں پر گولی چلا دی جس میں پانچ ہلاک ہوئے۔
ذرائع کے مطابق بی ایس ایف بٹالین 144، خاصہ اٹاری روڈ، بی ایس ایف امرتسر ہیڈ کوارٹر میں ڈیوٹی پر تعینات جوان نے ڈیوٹی کے دوران اپنی رائفل سے فائرنگ شروع کردی۔
بتایا گیا کہ کانسٹیبل اپنے کیمپ میں کافی دیر تک فائرنگ کرتا رہا اور اس کے بعد ملزم نے بی ایس ایف ہیڈکوارٹر کے اسپتال کے قریب خود کو گولی مار لی جس کے نتیجے میں وہ بھی شدید زخمی ہو گیا۔
تمام زخمی بی ایس ایف اہلکاروں کو علاج کے لیے اسپتال پہنچایا گیا ہے۔
