اس موقع پر انھوں نے کہا کہ کسان تحریک کو جس طرح امن اور بھائی چارے کے ساتھ پچھلے دو ماہ سے چلایا جارہا ہے،اسی طرح جاری رکھنا چاہیے۔ اور کسان تحریک کے لئے ان کی حمایت جاری رہے گی۔
انہوں نے حکومت پر کسانوں کی تحریک کو بدنام کرنے کی سازش رچنے کا الزام لگایا۔انھوں نے کہا کہ بی جے پی حکومت نہ صرف کسانوں کی تحریک کو بدنام کررہی ہے، بلکہ غلط طریقے اختیار کرکے اس تحریک کو ختم کرنے کی کوشش کررہی ہے۔ انہوں نے کہا کہ کاشتکار خود کو تنہا بالکل محسوس نہ کریں۔ پورے میوات کی یکطرفہ حمایت کسان تحریک کے ساتھ ہے۔
یوم جمہوریہ کے موقع پر ٹریکٹر پریڈ میں حصہ لینے والے کسانوں اور ان کے حامیوں کا چودھری آفتاب احمدنےشکریہ ادا کیا اور کہا کہ کسان کی حمایت میں کھڑے ہونے والے میوات کے نوجوانوں، کسانوں، مزدوروں، تمام مذاہب کے لوگوں کی جتنی بھی تعریف کی جائے کم ہے۔
اس موقع پر بھارتی کسان یونین کے ریاستی نائب صدر آزاد کھیڑی بھی موجود تھے۔
