مشہور شاعر منور رانا کے بیٹے تبریز رانا کو پولیس نے گرفتار کر لیا ہے۔ بتادیں کہ پولیس کافی عرصے سے انہیں ڈھونڈ رہی تھی۔ تبریز پر الزام ہے کہ انہوں نے مبینہ طور پر خود پر گولی چلاکر اپنے چچا کو اور بھائیوں کو پھسانے کی سازش کی تھی۔ پولیس ذرائع نے بتایا کہ تبریز رانا کو رائے بریلی پولیس نے لکھنؤ سے گرفتار کیا ہے۔ پولیس انہیں رائے بریلی لا رہی ہے۔
ذرائع کے مطابق تبریز رانا تقریبا ایک ماہ سے پولیس کی گرفت سے دور تھے، ان کا لوکیشن پولیس کو نہیں مل پا رہا تھا۔ ایس او جی کی ٹیم اور کرائم برانچ کی ٹیمیں تبریز کی گرفتاری کے لیے ممکنہ ٹھکانوں پر چھاپے مار رہی تھیں۔
اطلاع کے مطابق 28 جون کو تبریز رانا نے مبینہ طور پر خود پر حملے کی منصوبہ بندی کی تھی۔ سازش کے تحت تبریز نے صدر کوتوالی میں اپنے چچا کے خلاف مقدمہ بھی درج کرایا تھا۔ تاہم، تبریز کا جھوٹ صدر کوتوالی پولیس اور ایس او جی ٹیم کی تحقیقات میں پکڑا گیا۔ پولیس کی تفتیش سے پتہ چلا کہ تبریز نے خود پر حملے کی منصوبہ بندی کی تھی۔ اس معاملے میں پولیس پہلے ہی اس کے ساتھیوں کو گرفتار کر کے جیل بھیج چکی ہے۔
مزید پڑھیں: اندور ماب لنچنگ: اسدالدین اویسی کے ٹوئٹ پر ریاستی وزرا کا ردعمل
پولیس کی گرفتاری سے بچنے کے لیے تبریز رانا نے ہائی کورٹ تک بھاگ دوڑ کی تھی، لیکن انہیں وہاں سے کوئی راحت نہیں مل سکی۔ تبریز صدر کوتوالی میں درج کیس کی تفتیش کو منتقل کرنا چاہتا تھا، لیکن انہیں کامیابی نہیں ملی۔
