گونڈہ: اترپردیش کے ضلع گونڈہ کے شہر کوتوالی علاقے میں پولیس نے منگل کو بین ضلعی جعلی نوٹ گروہ کے سرغنہ سمیت تین اراکین کو گرفتار کر کے ان کے قبضے سے تقریبا 6 لاکھ روپئے کی جعلی کرنسی برآمد کی ہے۔ ڈپٹی سپرنٹنڈنٹ آف پولیس لکشمی کانت گوتم نے بتایا کہ منگل کی علی الصبح سونی گمٹی ریلوے کراسنگ کے نزدیک پولیس کا لوگو لگی ایک کار میں سوار جعلی نوٹ گروہ کا سرغنہ ننکے اپنے دو دیگر ساتھیوں نرسنگھ اور دلیپ کے ساتھ شہر کی جانب جارہا تھا کہ شہر و ایس او جی ٹیم نے گھیرا بندی کرکے کار سوار ننکے، نرسنگھ اور دلیپ کو گرفتار کر کے ان کے قبضے سے پستول، 95000 کی نقدی، آلات اور پانچ لاکھ 90ہزار کے پانچ پانچ سو کے جعلی نوٹ برآمد کئے ہیں۔
انہوں نے بتایا کہ بدمعاشوں میں ضلع بہرائچ کے پیاگ پور کے رہنے والا ننکے اور دھانے پور باشندہ نرسنگھ سگے ماما بھانجے ہیں۔ دونوں دیگر ساتھیوں کے ساتھ گروہ بنا کر لوگوں سے دوگنا کرنے کے نام پر رقم حاصل کرتے تھے پھر کچھ دن بعد پرنٹر سے چھاپ کرنقلی نوٹ انہیں دے دیتے تھے۔ گوتم نے بتایا کہ لوگوں کو رقم واپس کرتے وقت گروہ کا ایک رکن ایس او جی انچارج بن کر آجاتا تھا اور اصلی و نقلی دونوں کرنسیاں واپس لے کر غائب ہوجاتا تھا۔ پکڑے گئے گروہ نے دھانے پر تھانہ علاقے میں آٹھ لاکھ کی ٹھگی کی تھی۔ اس سلسلے میں پولیس گروہ کے دیگر اراکین کی تلاش میں ممکنہ ٹھکانوں پر چھاپے ماری میں مصروف ہے۔
یواین آئی
