قطب کمپلیکس معاملے Qutub Minar Complex Issue میں لیگل ایکشن فار جسٹس نے اہم کردار ادا کیا ہے، ای ٹی وی بھارت کے نمائندے نے لیگل ایکشن فار جسٹس کے صدر اسد حیات خان سے بات کی، جس میں انہوں نے بتایا کہ قطب مینار اور اس کے پورے کمپلیکس کو حکومت ہند نے 16 جنوری 1914 کو ایک سرکاری گزٹ شائع کرکے ایک محفوظ آثار قدیمہ قرار دیا تھا۔
انہوں نے کہا کہ اس وقت اس عمارت میں کسی مذہب کے پیروکاروں کی طرف سے کوئی مذہبی عبادت یا پوجا نہیں ہوتی تھی۔ کسی بھی شخص نے ایکٹ کے تحت محفوظ آثار قدیمہ قرار دیے جانے کے نوٹیفکیشن کو مسترد کرنے یا اپنا پوجا کرنے کے حق کو بحال کرنے کے لیے کوئی سوٹ 1914 یا اس کے تین سال بعد تک داخل نہیں کیا۔
انہوں نے مزید کہا کہ قطب مینار کمپلیکس علاقے میں اس عمارت کی تعمیر سنہ 1191 میں ہوئی۔ اس کے بعد سے اب تک وہاں کوئی مندر نہیں ہے اور اس سے قبل مندر تھا، اس کا کوئی پختہ ثبوت موجود نہیں ہے۔ پلیس آف ورشپ ایکٹ 1991 کے تحت بھی ایسے معاملے پر کوئی مقدمہ چلانے کی اجازت نہیں دیتا۔
یہ بھی پڑھیں: قطب مینار احاطہ میں واقع قوۃ الاسلام مسجد بھی تنازع کا شکار
لیگل ایکشن فار جسٹس کے سیکرٹری ایڈووکیٹ محمد انور صدیقی نے بتایا کہ اگر قطب مینار معاملہ پر دوسرے فریق دہلی ہائی کورٹ کا رخ کریں گے تو ہمارا ٹرسٹ اس کے خلاف بھی عدالت میں پیش ہوگا۔
