غازی آباد: غازی آباد میں عاص محمد نامی ایک رکشہ ڈرائیور نے ایمانداری کا مظاہرہ کرکے لوگوں کے لئے ایک مثال قائم کردی ہے جس کے سبب اس کی ہر طرف تعریف ہو رہی ہے۔ دراصل عاص محمد کو تالاب کے کنارے 25 لاکھ روپے سے بھرا بیگ ملا جس کی اطلاع انہوں نے پولیس کو دی۔ پولیس نے رکشہ ڈرائیور آس محمد کی بہت تعریف کی ہے اور بیگ کو اپنے قبضے میں لے لیا ہے۔
قابل ذکر ہے کہ یہ معاملہ غازی آباد کے مودی نگر تھانہ علاقہ سے متعلق ہے۔ ای رکشہ ڈرائیور عاص محمد اپنا رکشہ لے کر یہاں سے جا رہے تھے کہ ان کی نظر ٹبرا روڈ کے قریب تالاب کے کنارے پڑے ایک لاوارث بیگ پر پڑی۔ اسی دوران عاص محمد نے اپنے ایک جاننے والے سرفراز علی کو وہاں سے گزرتے دیکھا۔ دونوں نے اس سلسلے میں پولیس کو اطلاع دی، جس کے بعد پولیس نے بیگ کو اپنے قبضے میں لے لیا۔ رکشہ ڈرائیور کی ایمانداری کو دیکھ کر ڈی سی پی رورل روی کمار نے بھی ان کی کافی تعریف کی۔
مزید پڑھیں: اندور میں رکشا ڈرائیور نے ایمانداری کی مثال قائم کی
یہ ساری رقم آخر کس کی تھی، یہ بات ابھی تک واضح نہیں ہوئی۔ تاہم پولیس معاملے کی تحقیقات کر رہی ہے اور بیگ کے مالک کا پتہ لگا رہی ہے۔ اتنی بڑی رقم دیکھنے کے بعد کسی کے ذہن میں لالچ بھی آسکتا تھا لیکن ایمانداری کا مظاہرہ کرتے ہوئے غریب رکشہ والے نے رقم پولیس کے حوالے کر دی۔ جس کے بعد عاص محمد کی تصویر سوشل میڈیا پر وائرل ہو رہی ہے۔ ڈی سی پی رورل روی کمار کا کہنا ہے کہ اس معاملے میں اعلیٰ حکام کو بھی مطلع کر دیا گیا ہے۔ اس معاملے کی جانکاری محکمہ انکم ٹیکس کو بھی دے دی گئی ہے۔
