ملک کی کورونا وائرس سے شدید متاثرہ ریاستوں کے ڈاکٹرس کا مطالبہ ہے کہ انہیں زیادہ سے زیادہ آکسیجن فراہم کی جائے۔ کئی ڈاکٹرس میڈیا سے اپیل کررہے ہیں جبکہ کئی ڈاکٹرس نے عدالت میں عرضی دائر کی ہےکہ حکومت کو زیادہ سے زیادہ آکسیجن فراہم کرنے کی ہدایت دی جائے۔ چند ہسپتالوں نے آکسیجن نہ ہونے کے سبب مریضوں کو شریک کرنے سے انکار کردیا ہے
دہلی کے شانتی مکند ہسپتال کے سی ای او سنیل ساگر نے ان کے ہسپتال میں آکسیجن کی قلت کے بارے میں بات کرتے ہوئے جذباتی ہوگئے اور رو پڑے۔ انہوں نے کہا کہ ہسپتال میں صرف دو گھنٹوں کے لیے آکسیجن بچی ہے اس لیے مریضوں کو ہسپتال سے گھر بھیج دیا جائے۔
نویڈا کے کیلاش ہسپتال کے انتظامیہ نے کہا کہ ان کے پاس صرف چند گھنٹوں کے لیے آکسیجن بچی ہے۔ گوتم بدھ نگر میں اس گروپ کے چار ہسپتال ہیں۔ ہسپتال کی گروپ میڈیکل ڈائرکٹر ریتو بورا نے کہا کہ انہیں کہا گیا ہے کہ انہیں اگلے 36 گھنٹوں میں آکسیجن کی نئی سپلائی مل جائے گی۔ انہوں نے ہسپتال میں نئے مریضوں کا داخلہ بند کردیا ہے۔
اس سے قبل دہلی کے نائب وزیر اعلی منیش سسوڈیا نے آکسیجن کی فراہم کے مسئلہ پر مرکزی حکومت پر تنقید کرتے ہوئے کہا کہ دہلی کے کئی ہسپتال آکسیجن کی قلت کا شکار ہیں جبکہ چند ہسپتالوں میں بالکل آکسیجن نہیں ہے۔ انہوں نے کہا کہ انہیں آج صبح سے کئی ہسپتالوں کے مسلسل فون کالس اور میسیجس آرہے ہیں۔ ہم انہیں کسی طرح سے آکسیجن فراہم کررہے ہیں اور ہمارا اسٹاک ختم ہورہا ہے۔
