تمل ناڈو کے وزیر اعلیٰ ایم کے اسٹالن نے بدھ کے روز کہا کہ بلدیاتی انتخابات میں نو اضلاع میں پارٹی کی شاندار جیت ریاست میں گذشتہ پانچ ماہ میں بہتر حکمرانی کی علامت ہے۔
اسٹالن نےیہاں جاری ایک پریس ریلیز میں عوام کا شکریہ ادا کرتے ہوئے کہا کہ اسمبلی انتخابات کے بعد عوام نے اب بلدیاتی انتخابات میں پارٹی کی بہتر پالیسیز پر اعتماد کیا ہے اور ان انتخابات میں پارٹی کو مضبوط مینڈیٹ دیا ہے۔
انہوں نے کہا ،’یہ شاندار جیت گزشتہ پانچ ماہ میں پارٹی کی محنت اور عوام سے کیے گئے وعدوں کی تکمیل کا ثبوت ہے‘۔
انہوں نے کہا کہ ان انتخابات میں پارٹی کی شاندار فتح ڈی ایم کے پر عوام کا اعتماد ظاہر کرتی ہے اور جب ہم نے اقتدار سنبھالا تو مئی میں ریاست میں کورونا اپنے عروج پر تھا۔ ایک طرف کورونا سے پیدا ہونے والی ہیلتھ ایمرجنسی تھی اور دوسری طرف ریاست کے سامنے شدید مالی بحران تھا لیکن حکومت دونوں کو بہتر طریقے سے کنٹرول کرنے میں کامیاب رہی۔
وزیراعلیٰ نے کہا کہ اس وقت موقع کی نزاکت کو مدنظر رکھتے ہوئے ہم لوگوں کی ضروریات کو جانتے تھے اور انہی کے مطابق عمل کیا۔ مالی بحران کے باوجود ہم نے انتخابات کے دوران کیے گئے 200 سے زائد وعدے پورے کیے۔
اسٹالن نے کہا کہ نو اضلاع میں بلدیاتی انتخابات میں پارٹی کی جیت اس کی محنت اور اچھی حکمرانی کا نتیجہ ہے اور پچھلے پانچ ماہ میں لوگوں کا پارٹی پر اعتماد بڑھا ہے۔
تمام امیدواروں کو مبارکباد دیتے ہوئے انہوں نے کہا کہ جن کاموں کو عام طور پر مکمل ہونے میں پانچ سال لگتے تھے وہ اب پانچ ماہ میں مکمل ہوچکے ہیں۔
یو این آئی
