سماجوادی پارٹی کے قدآور رہنما اور رامپور کے رکن پارلیمان اعظم خاں اور ان کے فرزند عبداللہ اعظم گزشتہ ڈیڑھ برس سے سیتاپور کی ضلع جیل میں قید ہیں۔ اترپردیش میں یوگی آدتیہ ناتھ کے اقتدار میں آنے کے بعد سے اعظم خاں پر سو سے زائد مقدمات عائد ہوگئے تھے، جس کے بعد سے وہ جیل میں ہیں۔ اعظم خاں کے حامی مختلف انداز میں احتجاجی مظاہرے کرکے اپنے رہنما کی رہائی کا مطالبہ کر تے رہے ہیں۔
اب رامپور میں 'سماجوادی چھاتر سبھا' کے ضلع صدر ویبھو یادو نے اپنی شادی کے دعوت نامہ پر اعظم خاں اور عبداللہ اعظم کی رہائی کا مطالبہ کرکے انوکھے انداز میں اپنا احتجاج درج کرایا ہے۔ ویبھو یادو نے اپنے دعوت نامہ پر درج کرایا ہے کہ 'ہمارے رہنما اعظم خاں اور عبداللہ اعظم خاں کو رہائی دی جائے'۔
ویبھو یادو نے کہا ہے کہ ان کے رہنما جیل میں ہیں اور وہ چاہتے ہیں کہ اعظم خاں اور عبداللہ اعظم کو جلد رہائی دی جائے۔
