دارالحکومت دہلی میں یکم ستمبر سے 9ویں کلاس سے اوپر کے اسکول، کالج اور کوچنگ سینٹر کھولے جائیں گے۔ اس سلسلے میں دہلی حکومت کی جانب سے ایس او پی جاری کردی گئی ہے۔
دہلی حکومت کے ایس او پی کے مطابق یکم ستمبر سے کھلنے والے اسکولوں اور کالجوں میں 50 فیصد طلباء کے ساتھ کلاسز چلیں گی۔ اس کے ساتھ، تمام اسکولوں اور کالجوں میں ہنگامی استعمال کے لیے کورنٹائن سینٹر بھی قائم کیے جائیں گے۔
دہلی کے نائب وزیر اعلیٰ منیش سسودیا نے جمعہ کو ایک پریس کانفرنس کرتے ہوئے اسکول کھولنے کا اعلان کیا تھا۔ انہوں نے کہا تھا کہ اس کے لیے ایس او پیز جاری کیے جائیں گے، جن پر عمل کرنا ہوگا۔
انہوں نے کہا تھا کہ اب دہلی میں کورونا کے کیسز کم ہیں۔ دہلی ڈیزاسٹر مینجمنٹ اتھارٹی (ڈی ڈی ایم اے) کی میٹنگ میں اس بات پر تبادلہ خیال کیا گیا کہ اب جب کہ تمام سرگرمیاں کھول دی گئی ہیں، تعلیم کا بہت نقصان ہو رہا ہے۔ آن لائن تعلیم کبھی بھی آف لائن تعلیم کا متبادل نہیں ہو سکتی۔ اس کو تمام اساتذہ، ماہرین اور بچے مانتے ہیں۔
انہوں نے کہا کہ دارالحکومت میں اسکولوں، کوچنگ سینٹرز اور کالجوں کی سرگرمیاں شروع کی جائیں۔ یہ سرگرمیاں دھیرے دھیرے شروع کی جائیں گی۔ پہلے یہ اجازت بڑے بچوں کے لیے دی جا رہی ہے۔
سیسودیا نے کہا کہ جو بھی اسکول، کالج کھولا جائے گا، وہاں قوانین پر عمل کیا جائے گا۔ ساتھ ہی کسی بچے کو آنے پر مجبور نہیں کیا جائے گا۔ کلاس آن لائن بھی ہوگی اور آف لائن بھی۔ اس دوران بچوں کی غیر موجودگی نہیں لگے گی۔ انہوں نے کہا کہ دیگر ریاستوں میں بھی اسکول اور کالج کھول دیے گئے ہیں۔ دہلی بھی اس سمت میں آگے بڑھ رہا ہے۔
