تریپورہ تشدد پر عدالت عظمیٰ از خود نوٹس لے: سید بابر اشرف

اجمیر درگاہ کمیٹی کے نائب صدر سید بابر اشرف نے کہا کہ ملک کے دانشور طبقہ کو چاہیے کہ متحد ہوکر تریپورہ میں ہونے والے تشدد (tripura violence) کے خلاف آواز بلند کریں اور ملک کے سامنے آنے والے خطرات سے نمٹنے کے لیے ہر ممکن کوشش کریں۔ انہوں نے کہا کہ وزیر اعظم نریندر مودی اور وزیر داخلہ امت شاہ کو اس معاملے میں دخل اندازی کرکے حالات کو قابو کرنا چاہیے۔

ریاست تریپورہ میں ہونے والے فرقہ وارانہ فسادات کے معاملے میں اجمیر درگاہ کمیٹی کے نائب صدر سید بابر اشرف نے اپنے ردعمل کا اظہار کرتے ہوئے کہا کہ عدالت عظمیٰ کو ازخود نوٹس لے کر تشدد میں ملوث افراد کے خلاف کارروائی کا حکم جاری کرنا چاہئے، اگر ملک کی عدلیہ سے عوام کا اعتماد اٹھ گیا تو ملک کا مستقبل تاریکیوں میں چلا جائے گا۔

انہوں نے کہا کہ ملک کے دانشور طبقہ کو چاہیے کہ متحد ہوکر تریپورہ میں ہونے والے تشدد کے خلاف آواز بلند کریں اور ملک کے سامنے آنے والے خطرات سے نمٹنے کے لیے ہر ممکن کوشش کریں۔ انہوں نے کہا کہ وزیر اعظم نریندر مودی اور وزیر داخلہ امت شاہ کو اس معاملے میں دخل اندازی کرکے حالات کو قابو کرنا چاہیے اور ملک میں مذہب کے نام پر تشدد کرنے والوں کے خلاف سخت کارروائی کرنی چاہیے۔انہوں نے کہا کہ بین الاقوامی سطح پر کئی ممالک کے لوگوں نے مجھ سے رابطہ کیا اور تریپورہ معاملات پر بات کی، تریپورہ کے حالات پر وہ سخت غم و غصہ کا اظہار کررہے تھے لیکن ہمیں لگتا ہے کہ حکومت اس معاملے میں دخل اندازی کرکے حالات پر قابو پاسکتی ہے۔

انہوں نے مزید کہا کہ فیکٹ فائنڈنگ ٹیم کے اوپر یو اے پی اے جیسے سنگین دفعات کے تحت مقدمہ درج کرنا لائق مذمت اور افسوس ناک ہے۔ آئین کے تحت جو اختیارات ہمیں ملے ہیں ان اختیارات کو استعمال کرتے ہوئے تشدد کو روکا جائے، اس کے خلاف مظاہرے ہوں، جانچ ہو اور ملزمین کے خلاف سنگین دفعات میں مقدمہ درج کیا جائے، یہ ملک کے لیے اچھے اشارے نہیں ہیں۔

انہوں نے مزید کہا کہ عدالت عظمیٰ از خود نوٹس لے کر عوام کے اعتماد کو بحال کرے اور تشدد میں ملوث افراد کے خلاف سخت سے سخت کارروائی کرنے کا حکم جاری کرے۔