وزیراعظم مودی نے کرپٹو کرنسی سے متعلق مسائل پر ایک میٹنگ کی صدارت کی۔ ذرائع نے بتایا کہ غیر ریگولیٹڈ کرپٹو مارکیٹس کو کالے دھن کو سفید کرنے اور دہشت گردانہ سرگرمیوں کی مالی معاونت کی اجازت نہیں دی جا سکتی۔
حکومت کو کرپٹو مارکیٹس کے لیے ضروری فریم ورک بنانے کے لیے ماہرین اور اسٹیک ہولڈرز کے ساتھ فعال طور پر مشغول ہونا پڑے گا۔
یہ میٹنگ ریزرو بینک آف انڈیا، وزارت خزانہ اور وزارت داخلہ کے ذریعہ کئے گئے مشاورتی عمل کے بعد منعقد ہوئی، جس میں عالمی اور بھارتی ماہرین سے مشورہ کیا گیا۔ ساتھ ہی عالمی مثالوں اور بہترین طریقوں کا بھی مطالعہ کیا گیا۔
اس بات پر بھی تبادلہ خیال کیا گیا کہ غیر منظم کرپٹو کرنسی کو منی لانڈرنگ اور دہشت گردی کی مالی معاونت کا راستہ نہیں بننے دیا جا سکتا۔
ذرائع نے بتایا کہ حکومت اس حقیقت سے آگاہ ہے کہ یہ ایک جدید ٹیکنالوجی ہے، اس لیے وہ اس پر کڑی نظر رکھے گی اور فعال اقدامات کرے گی۔
اجلاس میں اس بات پر بھی اتفاق کیا گیا کہ حکومت کی جانب سے اس شعبے میں اٹھائے جانے والے اقدامات ترقی پسند اور مستقبل کے حوالے سے ہوں گے۔ حکومت ماہرین اور دیگر اسٹیک ہولڈرز کے ساتھ فعال طور پر رابطے جاری رکھے گی۔
چونکہ یہ مسئلہ انفرادی ممالک کی حدود سے متعلق ہے، اس لیے یہ محسوس کیا گیا کہ اس کے لیے عالمی شرکت اور اجتماعی حکمت عملی کی بھی ضرورت ہوگی۔
آر بی آئی نے متعدد دفعہ کرپٹو کرنسی کے خلاف اپنے مضبوط موقف کا اعادہ کیا ہے اور کہا ہے کہ اس سے ملک کے معاشی اور مالی استحکام کو سنگین خطرہ لاحق ہو سکتا ہے۔ مرکزی بینک نے ان کی مارکیٹ ویلیو پر بھی شکوک و شبہات کا اظہار کیا ہے۔
یہ بھی پڑھیں
آر بی آئی کے گورنر شکتی کانت داس نے بدھ کے روز کرپٹو کرنسی کی اجازت دینے کے خلاف اپنے خیالات کا اعادہ کیا اور کہا کہ وہ کسی بھی مالیاتی نظام کے لیے سنگین خطرہ ہیں، کیونکہ ان پر مرکزی بینکوں کا کنٹرول نہیں ہے۔
کرپٹو کرنسی پر آر بی آئی کے اندرونی پینل کی رپورٹ اگلے ماہ متوقع ہے۔
سپریم کورٹ نے مارچ 2020 کے اوائل میں کرپٹو کرنسی پر پابندی لگانے والے آر بی آئی کے سرکلر کو منسوخ کردیا تھا۔ اس کے بعد 5 فروری 2021 کو مرکزی بینک نے اس ڈیجیٹل کرنسی کا ماڈل تجویز کرنے کے لیے ایک اندرونی کمیٹی تشکیل دی تھی۔
