اسپتال انتظامیہ نے بتایا کہ ڈاکٹر عصمت رونیال کی سربراہی میں ڈاکٹروں کی ایک ٹیم کے ذریعے جمعہ کی شام ٹراما سینٹر میں قائم کووڈ اسپتال رامبن میں ایک کورونا وائرس سے متاثرہ حاملہ خاتون کی مائنر سرجری کی گئی۔
خاتون نے ڈسٹرکٹ اسپتال رامبن میں زچگی کے دوران بچے کو جنم دیا۔میڈیکل سپرنٹنڈنٹ ضلع اسپتال رامبن ڈاکٹر عبدالحمید زرگر نے تصدیق کرتے ہوئے بتایا کہ ماں اور بچہ دونوں صحت مند ہیں۔
انہوں نے کہا کہ نوزائیدہ بچے کا (آر اے ٹی) ٹیسٹ کروایا گیا جو ابھی منفی آیا ہے۔ انہوں نے کہا کہ یہ ٹیسٹ ماہر ڈاکٹرس اور پیرا میڈیکل اسٹاف کی ٹیم کے ذریعہ کروایا گیا تھا جس میں کووڈ پروٹوکول کا مکمل بندوبست رکھا گیا تھا۔
واضح رہےکہ کووڈ کی پہلی لہر میں ڈاکٹر عصمت رونیال کے بڑے بھائی ڈاکٹر نوید رونیال نے ضلع ہسپتال رامبن اور سب ضلع ہسپتال بانہال میں سینکڑوں کووڈ مثبت مریضوں کی جان بچائی تھی۔
تاہم وہ خود اس وبائی بیماری میں خدمات انجام دیتے ہوئے جاں بحق ہو گئے تھے۔ وہیں کووڈ مثبت مریض کے تیماردار عاشق علی نے ہسپتال انتظامیہ خاص کر میڈیکل ٹیم کا دو جانوں کو بچانے پر شکریہ ادا کیا ہے۔
