دہلی یونیورسٹی میں بی اے انگلش آنرز کورس سے مہاشویتا دیوی کی لکھی ہوئی مختصر کہانی دروپدی کو ہٹانے پر تنازع جاری ہے۔ اس مختصر کہانی پر اساتذہ دو گروپوں میں منقسم ہو گئے ہیں۔ اساتذہ کا ایک گروپ مسلسل احتجاج کر رہا ہے۔ ان کا ماننا ہے کہ یہ دلت مخالف ذہنیت ہے۔ اساتذہ کے دوسرے گروپ کا کہنا ہے کہ جو تنازع پیدا کیا جا رہا ہے وہ مکمل طور پر درست نہیں ہے۔
ہم آپ کو بتاتے چلیں کہ حال ہی میں دہلی یونیورسٹی میں اکیڈمک کونسل کی میٹنگ میں یہ معاملہ زور پکڑنے لگا۔ میٹنگ کے دوران، تقریبا 14 اراکین نے بی اے انگلش آنرز کے نصاب میں تبدیلیوں پر اختلافی نوٹ دیا تھا۔ اب اس معاملے پر دہلی یونیورسٹی سے منسلک رام لال آنند کالج میں شعبہ انگریزی میں کام کر رہی ڈاکٹر پریرنا ملہوترا نے اپنا رد عمل دیتے ہوئے کہا کہ یہ تنازع مکمل طور پر درست نہیں ہے۔ مہاشویتا دیوی کو انگریزی کے نصاب سے نہیں ہٹایا گیا ہے۔ ان کی کہانی 'دی وہائی وہائی گرل' اور ایک ڈرامہ 'بیون' نظر ثانی شدہ نصاب کا حصہ ہیں۔ یہ کہانی اور ڈرامہ قبائلی خواتین کی جدوجہد پر مبنی ہے۔
یہ بھی پڑھیں:
دہلی فساد: عدالت کے فیصلے سے ہمارے موقف کو تقویت ملتی ہے: ارشد مدنی
یہ بات قابل ذکر ہے کہ دروپدی کی کہانی کے بجائے، 20 ویں صدی کے اوائل کی مسلم حقوق نسواں کی جہد کار مصنفہ بیگم رقیہ کی کہانی 'سلطاناز ڈریم' کو خواتین کے تحریری مقالے میں شامل کیا گیا ہے۔ اس مقالے میں میری وولسٹون کرافٹ، ایلس واکر اور دیگر نمایاں حقوق نسواں کے جہد کار مصنفین شامل ہیں۔ انسٹی ٹیوٹ میں ایک مسلم حقوق نسواں مصنفہ کو پیپر میں شامل کرنا ایک قابل ستائش قدم ہے۔
اس معاملے میں ڈاکٹر پریرنا نے کہا کہ جہاں تک دلت ادب کا تعلق ہے، یہ کہنا بھی غلط ہوگا کہ دہلی یونیورسٹی کے انگریزی نصاب سے دلت ادب کو ہٹا دیا گیا ہے۔ تاہم ترمیم کے بعد انگریزی کے نصاب میں 21 نئے پیپر شامل کیے گئے ہیں، جن میں سے بیشتر پسماندہ طبقات کے بارے میں ہیں۔ کاسٹ اینڈ لٹریچر کا پورا پیپر ذات پات کے نظام پر ہے۔ اس میں 16 دلت ادیبوں کو شامل کیا گیا ہے۔ نیشنل ڈیموکریٹک ٹیچرز فرنٹ نے سمسٹر 5 اور 6 کے بی اے انگلش آنرز کے ترمیم شدہ نصاب کی بھی حمایت کی ہے۔
