خطرناک حد تک بڑھی فضائی آلودگی کی سطح کو کم کرنے کے لیے گریٹر نوئیڈا اتھارٹی نے چار دنوں کے لیے شہر میں ہر قسم کی تعمیرات پر پابندی لگا دی ہے۔ اتھارٹی نے ہدایات کی خلاف ورزی کرنے پر 13 ٹھیکیداروں، بلڈرز اور دیگر پر 10 لاکھ روپے جرمانہ عائد کیا ہے۔
این سی آر میں بڑھتی ہوئی آلودگی کے پیش نظر ایئر کوالٹی مینجمنٹ کمیشن نے تمام حکام اور مقامی انتظامیہ کو تعمیراتی کام روکنے کی ہدایت دی تھی۔ گریٹر نوئیڈا اتھارٹی کے سی ای او نریندر بھوشن کی ہدایات پر اے سی ای او دیپ چند نے ایک حکم نامہ جاری کر کے شہر میں چار دنوں کے لیے تمام قسم کے تعمیراتی کاموں پر پابندی لگا دی ہے۔ اس کی نگرانی کی ذمہ داری پبلک ہیلتھ ڈیپارٹمنٹ کے ساتھ ساتھ تمام ورک سرکلز کو دی گئی۔
سینئر منیجر پبلک ہیلتھ سلیل یادو نے بتایا کہ اس دوران اب تک 13 ٹھیکیداروں، بلڈروں و دیگر آلودگی کو روکنے کے لیے قوانین کی خلاف ورزی کرنے پر 9.95 لاکھ روپے جرمانہ کیا گیا ہے۔ساتھ ہی اتھارٹی نے گریٹر نوئیڈا میں پروجیکٹ پر کام کرنے والے ٹھیکیداروں پر آلودگی پھیلانے کے لیے این جی ٹی کے قوانین کی خلاف ورزی کرنے پر جرمانہ بھی عائد کیا۔
- مزید پڑھیں: دہلی میں آلودگی بدستور برقرار
سی ای او نریندر بھوشن نے شہر کے مکینوں سے اپیل کی ہے کہ وہ کچرے کو نہ جلائیں، گھریلو کچرے سے کھاد بنائیں اور آلودگی کو روکنے کے لیے اس کے ارد گرد زیادہ سے زیادہ پودے لگائیں۔
