مہاراشٹر کانگریس کے ترجمان سچن ساونت نے مطالبہ کیا ہے کہ 'تفتیشی افسر کے رپورٹ کو خارج کرنے کے لیے سی بی آئی کی جانب سے رچی سازش کی سپریم کورٹ کی نگرانی میں تحقیقات کی جائے۔رواں برس 24 اپریل کو انیل دیشمکھ اور کچھ نامعلوم افراد کے خلاف بدعنوانی اور بدانتظامی کے الزام میں ایف آئی آر درج کی گئی تھی۔ سی بی آئی نے ہائی کورٹ کے حکم کے بعد اس معاملے میں ابتدائی انکوائری شروع کی تھی۔
سابق پولیس کمشنر نے الزام لگایا تھا کہ انیل دیشمکھ نے کچھ پولیس افسران سے ممبئی کے بار اور ریسٹورنٹ سے ماہانہ 100 کروڑ روپے وصولی کرنے کو کہا تھا۔ انیل دیشمکھ نے اس معاملے کی ابتدائی تحقیقات کا حکم دینے کے بعد اپریل میں وزیر داخلہ کے عہدے سے استعفیٰ دے دیا تھا ، لیکن اس طرح کے الزامات کو بے بنیاد قرار دیا۔
سچن ساونت نے ٹویٹ کیا کہ 'ابتدائی تفتیش میں، سی بی آئی کے تفتیشی افسر اس نتیجے پر پہنچے ہیں کہ سابق کمشنر آف پولیس کی جانب سے 100 کروڑ روپے اکٹھے کرنے کے الزام میں انیل دیشمکھ کا کوئی کردار نہیں ہے اور انہوں نے تفتیش بند کر دی ہے'۔
ایک اور ٹویٹ میں سچن ساونت نے کہا کہ 'ہم اس سازش کی سپریم کورٹ کی نگرانی میں تحقیقات کا مطالبہ کرتے ہیں تاکہ یہ معلوم ہو سکے کہ ایجنسی نے کس کے کہنے پر سی بی آئی کے تفتیشی افسر کی رپورٹ کو الٹ کر اپنا موقف تبدیل کیا۔ ہائی کورٹ نے انیل دیشمکھ کے خلاف ابتدائی انکوائری کے لیے کہا تھا لیکن سی بی آئی نے ہائی کورٹ کو گمراہ اور ایف آئی آر درج کر کے بہت بڑا جرم کیا ہے'۔
مزید پڑھیں: دنیا کو نوکلیئر سے پاک بنانے کی ضروت
نیشنلسٹ کانگریس پارٹی (این سی پی) کے سینئر رہنما انیل دیشمکھ نے کہا کہ ان کے خلاف جاری سی بی آئی تحقیقات غیر قانونی ہے، کیونکہ مرکزی ایجنسی نے ان کے خلاف مقدمہ چلانے کے لیے مہاراشٹر حکومت سے پیشگی منظوری نہیں لی تھی، سچن ساونت نے کہا کہ 'یہ واضح ہے کہ مودی حکومت ان ایجنسیوں کو اپنے سیاسی مخالفین کو نشانہ بنانے کے لیے کس طرح ہتھیار کے طور پر استعمال کر رہی ہے۔ انہوں نے الزام لگایا کہ عدالتوں کو بھی گمراہ کیا گیا، قوانین کو توڑا گیا، تفتیش بھی جاری رہی۔ ایسی سازشیں بغیر کسی رکاوٹ کے جاری رہیں۔ ایسے بڑے وقت میں ہماری جمہوریت کو بچانے کے لیے پورے ملک کو ایک ساتھ آنا چاہیے۔ این سی پی کے قومی ترجمان اور مہاراشٹر کے وزیر نواب ملک نے سی بی آئی مطالبہ کیا ہے کہ وہ انیل دیشمکھ کیس کے بارے میں درست معلومات دے۔
یو این آئی
