لداخ حکومت نے بی آر او سے غیر مقامی مزدوروں کو ضلع میں لانے پر پابندی عائد کرنے کا مطالبہ کیا ہے۔ حکومت نے کہا کہ لیہہ آنے والے اکثر غیر مقامی مزدوروں میں کورونا وائرس کے بڑھتے معاملات سامنے ارہے ہیں جو ایک تشویش کا امر ہے کیونکہ اس وجہ سے خطہ لداخ کے ضلع لیہہ میں کورونا وائرس کے مزید پھیلاؤ کا خدشہ لاحق ہوگیا ہے۔
حکومت نے واضح کیا ہے کہ لیہہ ہوائی اڈے پر آنے والے مقامی و غیر مقامی مسافروں کو کورونا ٹیسٹ کروانا لازمی قرار دے دیا ہے۔ جب تک ان کی ٹیسٹ رپورٹس موصول نہیں ہوتی تب تک ایسے آنے والے تمام مسافروں کو قرنطینہ میں رکھا جائے گا۔
حکومتی ترجمان کے مطابق لداخ آٹونامس ہل ڈویلپمنٹ کونسل کے چیئرمین تاشی گیلسن نے محکمہ صحت، پیرا ملٹری، پولیس اور ضلع انتظامیہ کے عہدیداروں کے ساتھ جمعہ کو اس سلسلے میں ایک اجلاس طلب کیا جس میں ضلع میں کورونا وائرس کے نئے معاملات میں اضافے پر تشویش کا اظہار کیا گیا اور بی آر او سے غیر مقامی مزدوروں کو لانے پر پابندی کا مطالبہ کیا گیا تاکہ کورونا وائرس کی مزید پھیلاؤ پر قابو پایا جاسکے۔
