کوئلہ بدعنوانی کے معاملے میں سی بی آئی کی ٹیم کی پوچھ گچھ کرنے سے پہلے ہی ترنمول کانگریس کی سربراہ ممتا بنرجی نے رکن پارلیمان ابھیشک بنرجی کی رہائش گاہ پہنچ کر وہاں موجود لوگوں سے بات چیت کی۔ سی بی آئی کی ٹیم کے ابھیشک بنرجی کی اہلیہ اور سالی سے پوچھ گچھ کرنے کے لئے پہنچنے سے پہلے ہی ترنمول کانگریس کی سربراہ ممتا بنرجی کی آمد نے پورے معاملے کو نیا موڑ دے دیا ہے۔
وزیراعلیٰ ممتا بنرجی پورے معاملے کا جائزہ لینے کے لیے ابھیشک بنرجی کے گھر موجود ہیں۔ وزیر اعلیٰ نے ابھی تک کن کن لوگوں سے بات چیت کی ہے اس کا خلاصہ نہیں ہو سکا ہے دوسری طرف ترنمول یوتھ کانگریس کے صدر ابھیشک بنرجی کی اہلیہ کا کہنا ہے کہ انہیں کچھ بھی معلوم نہیں کہ انہیں کیوں نوٹس دیا گیا ہے۔
انہوں نے کہا کہ اس کے باوجود بھی وہ تفتیش کے لیے سی بی آئی کے ساتھ تعاون کرنے کے لئے تیار ہیں لیکن اس سے پہلے انہیں نوٹس بھیجنے کی وجہ بتائی جائے۔ واضح رہے کہ گزشتہ سال 28 نومبر کو سی بی آئی کی مختلف ٹیموں نے مغربی بنگال کے مختلف اضلاع میں کوئلہ بدعنوانی کے معاملے میں بڑے پیمانے پر خصوصی چھاپہ ماری مہم چلائی تھی۔
سی بی آئی نے اس معاملے میں ایسڑن کوئل فیلڈ لمیٹڈ کے کئی اعلیٰ افسران پوچھ گچھ کی ہے۔ سی بی آئی کی خصوصی عدالت کی جانب سے انوپ ماجھی عرف لالہ کو مفرور قرار دیا گیا ہے۔ سی بی آئی کو اس کی تلاش ہے۔کوئلہ بدعنوانی کے معاملے میں سی بی آئی ابھیشک بنرجی کی سالی مینیکا گمبھیر سے پوچھ گچھ کرنا چاہتی ہے۔ بی جے پی کے بیشتر ارکان پارلیمان ترنمول یوتھ کانگریس کے صدر ابھیشک بنرجی کی اہلیہ کی شہریت کو لے سوال اٹھاتے رہے ہیں۔
