بانڈی پورہ: ورلڈ چنار ڈے کے موقع پر سوشل فارسٹری نے آج نیشنل ہائڈرو پاور کارپوریشن بانڈی پورہ کے ہیڈ کوارٹر کے احاطے میں چنار کے متعدد پودے لگائے۔ اس موقع پر رینج افسر سوشل فارسٹری بانڈی پورہ بلال احمد متو، بلاک افسر غلام محمد لون و محمد ارباز سامون کے علاوہ محکمے کے کئی دیگر افسران اور ملازمین موجود تھے۔ نیشنل ہائڈرو پاور کارپوریشن ہیڈکوارٹر بانڈی پورہ کے احاطے میں بین الاقوامی چنار کے دن کی مناسبت سے اس مہم کا آغاز کارپوریشن کے جنرل منیجر پیراگ سکسینہ کے ہاتھوں کرایا گیا۔
نیشنل ہائڈرو پاور کارپوریشن بانڈی پورہ کے ہمراہ NHPC کے دیگر افسران اور ملازمین بھی تھے ۔ جن میں جی ایم ای لکھمی چند، جی ایم ایم سنجے کمار بھی موجود تھے۔ اس موقع پر احاطے میں کئی چنار کے پودے لگائے گئے۔ شجر کاری کی افادیت بیان کرتے ہوئے NHPC کے جنرل منیجر نے کہا کہ ہمارے لئے یہ خوشی کا مقام ہے کہ سوشل فارسٹری نے اس موقع پر چنار کے درخت لگانے کے لئے ہمارے احاطے کو منتخب کیا۔
انہوں نے کہا کہ ہم سب مل کر ماحولیاتی چلینجز کا سامنا کر سکتے ہیں۔ اس کے لئے شجر کاری ایک اہم کڑی ہے۔ انہوں نے کہا کہ ہمارے پروجکٹوں کی وجہ جہاں کہیں بھی درختوں کا کٹاؤ ہوجاتا ہے یا جنگلات کو نقصان پہنچتا ہے، ہم اس کی بھرپائی کرنے کی ہر ممکن کوشش کرتے ہیں۔ وہیں رینج افیسر محکمہ سوشل فارسٹری بانڈی پورہ نے چنار کے درخت کی تاریخ پر روشنی ڈالتے ہوئے کہا کہ کس طرح سے یہ منفرد درخت ہمارے بزرگوں، آباؤ اجداد، سنتوں اور ولیوں کی جانب سے ہمیں وراثت میں ملا ہے۔ اس کی حفاظت کرنا اور اسے ناپید ہونے سے بچانا ہمارے لئے کس قدر ضروری ہے۔ انہوں نے کہا کہ کشمیر میں آج بھی ایسے چنار کے پیڑ ہیں، جو صدیوں سے اپنی رونق بکھیرے ہوئے ہیں۔
یہ بھی پڑھیں: Chinar Day Celebrations اننت ناگ میں محکمہ جنگلات کی جانب سے چنار ڈے منایا گیا
