بھارت کے جدید ترین رافیل طیاروں کی سیکورٹی کو پختہ کرنے کے لیے بھارتی فضائیہ کے افسران اور ضلعی عہدیداروں کے مابین میٹنگ کا سلسلہ متواتر طور پر جاری ہے۔بدھ کے روز امبلا میونسپل کارپوریشن کمشنر کے دفتر میں بھارتی فضائیہ کے افسران اور ضلعی عہدیداروں کے درمیان ایک میٹنگ ہوئی ہے۔
جس میں بھارتی فضائیہ کے افسران نے بتایا کہ ایئر فورس کے قریبی علاقے جیسے بلدیو نگر اور دھول کوٹ میں بچے بیٹری سے چلنے والے ہیلی کاپٹر اور دیگر کھلونے اڑا رہے ہیں، جو کافی اونچائی تک اڑتے ہیں۔ عہدیداروں نے بتایا کہ ٹیک آف اور لینڈنگ کے وقت رافیل کو ان کھلونوں سے خطرہ لاحق ہے۔
اس موضوع پر میونسپل کارپوریشن کمشنر پراتھ گپتا نے تفصیل سے بتایا کہ رافیل کی سیکورٹی کو مضبوط بنانے کے لیے کیا کیا اقدامات کیے جاسکتے ہیں، اسی سلسلے میں میٹنگ میں تبادلہ خیال کیا گیا۔
انہوں نے بتایا کہ ایئر فورس کے قریبی علاقے میں پتنگ بازی اور کبوتر بازی پر مکمل طور پر پابندی عائد کرنے کے لیے ٹیمیں تشکیل دی گئی ہیں۔ساتھ میں ان پابندیوں کی خلاف ورزی کرنے والوں کے خلاف سخت کارروائی کی جائے گی۔اس کے علاوہ بچوں کے بیٹری والے ہیلی کاپٹر کو اڑنے پر بھی پابندی عائد کی گئی ہے۔
انہوں نے مزید بتایا کہ مردہ جانوروں کو دفنانے، کچڑے کے ڈھیر جیسے مسائل پر بھی تبادلہ خیال کیا گیا ہے۔
