ترال: جموں و کشمیر کے ترال میں پارٹی میٹنگ کے بعد اپنے خیالات کا اظہار کرتے ہوئے بی جے پی کے سینیئر لیڈر و سابق وزیر سنیل شرما نے کہا کہ جموں و کشمیر میں ہونے والےاسمبلی انتخابات کے لئے بھارتیہ جنتا پارٹی نے پوری طرح کمر کس لی ہے اور ان انتخابات میں بی جے پی غیر معمولی کارکردگی کا مظاہرہ کرے گی۔
ای ٹی وی بھارت کے ساتھ خصوصی بات چیت کرتے ہوئے سنیل شرما نے بتایا کہ اس وقت بھارتیہ جنتا پارٹی پورے کشمیر میں ووٹ بینک کو بڑھانے کے لیے کام کر رہی ہے اور رائے عامہ کو منظم کرنے کے لیے کام کیا جا رہا ہے جبکہ بوتھ لیول پر ووٹرز کا اندراج اور دیگر معاملات بھی دیکھے جا رہے ہیں۔
وہیں جنوبی کشمیر کے شوپیان میں جاوید قادری کے پارٹی چھوڑنے کے سوال پر بی جے پی رہنما سنیل شرما نے بتایا کہ یہ پارٹی کسی فرد کی پارٹی نہیں ہے بلکہ دنیا کی سب سے بڑی پارٹی ہے اور کسی ایک کے چھوڑنے سے پارٹی کو کوئی نقصان نہیں ہو سکتا۔ سنیل شرما نے دعویٰ کیا کہ بی جے پی نے جن دس سیٹوں پر فوکس کیا ہے ان میں ترال سرفہرست ہے اور اس کے لیے جس طرح آج ورکرز نے جوش و جزبہ دکھایا ہے۔ اس سے صاف ظاہر ہوتا ہے کہ ترال سے اگلا ممبر اسمبلی بی جے پی کا ہی ہوگا۔
