حیدر آباد: وزیر اعظم مودی آج بی جے پی کی قومی ایگزیکٹو میٹنگ کے لیے حیدرآباد پہنچے ہیں۔ اس دوران ایئر پورٹ پر ان کا شاندار استقبال کیا گیا جبکہ صدارتی الیکشن میں اپوزیشن کے مشترکہ امیدوار یشونت سنہا بھی آج تلنگانہ دورے پر ہیں اسی لیے تلنگانہ کے وزیراعلی، نریندر مودی کو ریسیو کرنے ایئر پورٹ نہیں پہنچ سکے۔ PM Modi Arrived in Hyderabad
حیدر آباد میں بی جے پی کی قومی ایگزیکٹیو میٹنگ 2 اور 3 جولائی کو ہو رہی ہے۔ اس موقع پر وزیر اعظم مودی، بی جے پی کے قومی صدر جے پی نڈا اور وزیر داخلہ امت شاہ سمیت پارٹی کے تمام بڑے لیڈر شامل ہوں گے۔ اجلاس کے ایجنڈے میں پارٹی توسیع سمیت کئی امور شامل ہیں۔ دوسری جانب بی جے پی کے قومی عاملہ کے اجلاس کے موقع پر ریاست کی حکمراں جماعت ٹی آر ایس کی جانب سے 'بائے بائے مودی' ریلی نکالی گئی۔ پرانے شہر حیدرآباد کے تاریخی چار مینار سے یہ ریلی نکالی گئی جس میں برسراقتدار جماعت کے حلقہ بہادر پورہ سے تعلق رکھنے والے کارکنوں نے شرکت کی۔
وزیراعظم نریندر مودی کا قیام تین دن تک مادھو پور کی نووٹل ہوٹل میں رہے گا۔ وزیر اعظم کو راج بھون میں ٹہرانے پر غور کیا گیا تھا، تاہم سکیورٹی وجوہات کی بنا پر ایس پی جی کی طرف سے نووٹل ہوٹل میں قیام کی اجازت دی گئی۔ وزیر اعظم 2، 3 اور 4 جولائی کو اس ہوٹل میں مقیم ہوں گے۔ 3 جولائی کو وزیر اعظم بڑے جلسہ عام سے خطاب کریں گے۔ حکام 5000 پولیس اہلکاروں کے ساتھ حفاظتی انتظامات کر رہے ہیں۔
وزیر اعظم مودی کے دورے کو لیکر سکیورٹی سخت: وزیر اعظم نریندر مودی کے 2 جولائی کو دورہ تلنگانہ کے پیش نظر سائبر آباد کے پولیس کمشنر ایم اسٹیفن رویندرا نے بدھ کو میٹرو پولیٹن کمشنریٹ علاقہ میں یکم سے 4 جولائی تک دفعہ 144 کے تحت حکم امتناعی نافذ کردیا ہے۔ سائبرآباد پولیس نے ایک الگ حکم میں دفعہ 144 کے تحت ڈرون کے خلاف امتناعی احکامات بھی جاری کیے۔
یہ بھی پڑھیں:TRS Rally in Hyderabad: حیدرآباد میں ٹی آر ایس کی ریلی، بائے بائے مودی کے نعرے
