ریاست اترپردیش میں رامپور میں تابش نامی شخص کو نامعلوم افراد نے گولی مار کر ہلاک کر دیا۔ اطلاع ملتے ہی پولیس جائے واردات پر پہنچ گئی۔
رامپور کے تھانہ گنج علاقہ میں تحصیل صدر کے نزدیک تابش پر گولی چلائی گئی، جس سے تابش کی موقع پر ہی موت ہوگئی۔ اطلاعات کے مطابق یہ واردات پرانی رنجش کے تحت انجام دی گئی۔
تابش تھانہ کوتوالی محلہ عید گاہ گیٹ کے رہنے والے تھے۔ واردات رات تقریباً 10:30 بجے کی ہے، جب تابش واپس اپنے گھر جا رہے تھے۔ اسی دوران یہ حادثہ پیش آیا۔
پولیس نے لاش کو اپنے قبضے میں لیکر ضلع ہسپتال کے پوسٹ مارٹم گھر میں رکھوا دیا ہے اور قاتلوں کو تلاش میں کوشاں ہے۔
لاک ڈاؤن کی وجہ سے رامپور کے ہر گلی چوراہے پر پولیس فورس تعینات ہے۔ اس کے باوجود بدمعاشوں نے ایک ہفتہ کے اندر اس دوسری خونی واردات کو انجام دیکر پولیس انتظامیہ کی کارکردگی پر سوال کھڑے کر دیے ہیں۔
گزشتہ جمعرات کو بھی کچھ نامعلوم افراد نے تھانہ سول لائن علاقے میں بی جے پی کے ایک مقامی رہنما انوراگ شرما کا گولی مارکر قتل کردیا تھا۔ پولیس اب تک اس معاملے میں کسی کو بھی گرفتار کرنے میں ناکام رہی ہے۔ اب دیکھنا یہ ہوگا کہ پولیس کو اس معاملے میں کب تک کامیابی ملتی ہے۔
