کورونا وائرس کی روک تھام کے لیے ملک میں جاری لاک ڈاؤن کے سبب ملک کی معیشت بری طرح متاثر ہوئی ہے جس کے لیے گزشتہ روز وزیراعظم نریندر مودی نے 20 لاکھ کروڑ روپے کے خصوصی پیکیج کا اعلان کیا تھا۔
تاہم اب ورلڈ بینک نے بھی بھارتی حکومت کے مختلف سماجی تحفظ کے پروگرامز کے لیے ایک ارب ڈالر دینے کا اعلان کیا ہے۔
ورلڈ بینک کے ایگزیکٹیو بورڈ آف ڈائریکٹرز نے 14 مئی کے اجلاس میں اس پیکیج کی منظوری دی جس کے بعد عالمی بینک کی كووڈ 19 سے نمٹنے کے لیے بھارت کو فراہم کی جا رہی مدد دو ارب ڈالر ہوگئی ہے۔
واضح رہے کہ گزشتہ ماہ بھارت کے طبی شعبے کو ورلڈ بینک نے ایک ارب ڈالر کی مدد فراہم کی تھی۔
نئے پیکیج کی رقم دو قسطوں میں فراہم کی جائے گی۔
رواں مالی سال میں پہلے 75 کروڑ ڈالر فوری طور پر دستیاب ہوں گے جبکہ بقیہ 25 کروڑ ڈالر آئندہ مالی سال میں ملیں گے۔
پہلی قسط کی رقم پردھان منتری غریب کلیان یوجنا کے تحت خرچ کی جائے گی جس سے نقدی ٹرانسفر اور خورد و نوش کی اشیا میں فائدہ ملے گا جبکہ دوسری قسط سماجی تحفظ کے کاموں میں خرچ کی جائے گی۔
