اترپردیش کے 73 اضلاع میں بی ایڈ میں داخلہ کے لیے محکمۂ تعلیم کی جانب سے اہلیتی امتحانات کی تیاری مکمل کر لی گئی ہیں۔ کورونا وائرس وبأ کو دیکھتے ہوئے ضلع انتظامیہ نے سخت انتظامات کیے ہیں۔
کُل 1089 سینٹر پر 4 لاکھ 31 ہزار 904 طلبا و طالبات کے امتحان میں شرکت کرنے کا امکان ہے لیکن ایک خدشہ یہ بھی ظاہر کیا جارہا ہے کہ ریاست میں کورونا کیسز کی تعداد میں روز بروز اضافہ ہوتا نظر آرہا ہے جس کے مد نظر بڑی تعداد میں طلبا و طالبات کے امتحان میں شریک نہ ہونے کی امید ہے۔
ریاست میں 1089 سینٹر بنائے گئے ہیں جبکہ سب سے زیادہ سینٹر دارالحکومت لکھنؤ میں ہیں۔ امتحان میں سماجی دوری کا خیال رکھنے کے لیے امتحان سینٹرز کی تعداد بڑھا دی گئی ہیں۔
واضح رہے کہ بی ایڈ امتحان میں دو پرچے ہوں گے۔ پہلا پرچہ صبح 9 بجے سے 12 بجے تک اور دوسرا پرچہ 2 بجے سے شام 5 بجے تک ہوگا۔
نقل روکنے کے لیے امتحان سینٹر میں سی سی ٹی وی کیمرے نصب کیے گئے ہیں۔ کورونا وبا کے مد نظر سبھی طلبا و طالبات کو ہدایت دی گئی ہے کہ وہ ماسک اور سینیٹائزر ساتھ لے کر آئیں لیکن کسی کے پاس نہ ہو تو امتحان سینٹر میں انہیں دونوں چیزیں مہیا کی جائیں گی۔
واضح رہے کہ اترپردیش میں ہفتے کے دو روز سنیچر اور اتوار کو لاک ڈاؤن نافذ ہوتا ہے لیکن امتحانات کے پیش نظر ریاستی حکومت نے بس اور دوسری سواریاں چلانے کی اجازت دے دی ہے تاکہ طلبا کو کسی طرح کی کوئی پریشانی نہ ہو۔
